Бугун, 29 июнь куни БМТ Бош котиби Антониу Гутерриш Марказий Осиё давлатларига сафар қилади. Гутерриш минтақага 2017 йилда ташриф буюрган эди.

Бу ҳақда унинг матбуот котиби Стефан Дюжаррик жума куни Нью-Йоркдаги брифингда маълум қилди. Унга кўра, ҳар бир давлатда БМТ Бош котиби давлат раҳбари ва бошқа юқори мартабали ҳукумат вакиллари билан учрашади, шунингдек, иқлим ўзгаришига қарши курашга оид лойиҳалар билан танишади ва маҳаллий фаоллар билан мулоқот қилади.У сафарини Ўзбекистон пойтахти Тошкент шаҳридан бошлайди.

4 июль куни Остонада Бош котиб Шанхай ҳамкорлик ташкилоти саммитида иштирок этади. Гутерриш ўз нутқида форум иштирокчиларига БМТ Низоми ва Инсон ҳуқуқлари умумжаҳон декларациясига асосланган кўп томонлама тамойилларга содиқлигини яна бир бор тасдиқлаш зарурлигини эслатиб ўтади. У бу саъй-ҳаракатларнинг марказида тинчлик бўлиши кераклигини таъкидлайди.

БМТ Бош котиби халқаро ҳамжамиятни геосиёсий тафовутлар умумий таҳдидларни, жумладан, иқлим ўзгаришига қарши курашни самарали ҳал қилишга имкон бермаслигидан огоҳлантириш ниятида.

Антониу Гутерриш 7 июль куни Нью-Йоркка қайтади.