Франция парламентининг қуйи палатаси кийим-кечак брендларига маҳсулотларни талабдан юқори миқдорда ишлаб чиқариш учун жарима солишни назарда тутувчи қонун лойиҳасини маъқуллади. Шу тариқа, расмийлар тезкор моданинг атроф-муҳитга салбий таъсирини компенсация қилмоқчи.

Франция парламентининг қуйи палатаси ўтган ҳафта Хитойнинг Shein каби компаниялар томонидан сотиладиган мода маҳсулотларини ўта тез ишлаб чиқаришга жарима солишни назарда тутувчи қонун лойиҳасини маъқуллади, деб ёзади Reuters.

Шу тариқа, француз ҳукумати тезкор моданинг атроф-муҳитга салбий таъсирини олдини олишни истайди.

Қонун лойиҳасида 2030 йилгача ҳар бир кийим учун жарима миқдорини босқичма-босқич ошириб, 10 еврогача ошириш, шунингдек, бундай маҳсулотларни реклама қилишни тақиқлаш назарда тутилган.

Қонун лойиҳасига барча депутатлар бир овоздан овоз беришди. Энди у Сенат томонидан тасдиқланиши керак.

Аввалроқ Франция атроф-муҳитни муҳофаза қилиш вазирлиги ҳам Европа Иттифоқига тўқимачилик чиқиндиларининг ёмонлашиб бораётган муаммосини ҳал қилиш учун фойдаланилган кийим экспортини тақиқлашни таклиф қилган эди.

Ўтган ёзда Франция ҳукумати кийими ёки пояфзалини таъмирлаш учун олиб кетган одамларга бонуслар тўлашини эълон қилган эди. Тўлов миқдори 6 евродан 25 еврогача ўзгаради. Чиқиндиларни камайтиришга қаратилган акция беш йил давом этади.

Бирлашган Миллатлар Ташкилотининг Атроф-муҳит бўйича дастури (ЮНЕП) ва Эллен МакАртур жамғармасининг 2019 йилдаги статистик маълумотларига кўра, мода саноати йиллик глобал карбонат ангидрид чиқиндиларининг 10 фоизини ташкил этган - бу барча халқаро рейслар ва юк ташишлар эмиссиясидан кўпроқдир.