1. Электрон идентификация қайси органлар томонидан амалга оширилади?

Фуқароларни жамоат жойларида электрон идентификация қилиш ички ишлар органлари патруль-пост хизмати саф бўлинмалари ходимлари томонидан амалга оширилади.

2. Фуқаролар қайси тизим орқали идентификация қилинади?

“Е-патруль” тизими орқали

3. Қандай ҳолларда ходимлар фуқароларни тўхтатиб, уларнинг шахсини аниқлаши мумкин?

Ходимлар қуйидаги ҳолларда фуқароларни тўхтатиши ва шахсини тасдиқловчи ҳужжатлар ёки “Е-патруль” тизими орқали уларнинг шахсини аниқлаши мумкин:

— шахс жиноят ёки маъмурий ҳуқуқбузарлик содир этган ёхуд қидирувда деб гумон қилиш учун асослар мавжуд бўлганда;

— шахсни содир этилган жиноят ёки маъмурий ҳуқуқбузарлик ҳақида маълумотга эга деб ҳисоблаш мумкин бўлганда;

—  қонунга мувофиқ шахсни ушлаб туриш учун бошқа қонуний асослар мавжуд бўлганда.

4. Қандай ҳолатларда фуқаро шахсига аниқлик киритиш учун ички ишлар органларига олиб борилади?

Ёнида шахсини тасдиқловчи ҳужжатлари бўлмаган фуқаро қуйидаги ҳолларда шахсига аниқлик киритиш учун ички ишлар органларига олиб борилади:

— унинг шахсини планшет орқали аниқлаш имкони бўлмаган ҳолларда;

— қидирувда бўлган ёки бедарак йўқолган шахслар аниқланган ҳолларда;

— шахсига аниқлик киритиш жараёнида қаршилик кўрсатган ҳолларда;

— жамоат жойларида ҳуқуқбузарлик содир этаётганда ушланган ҳолларда.

5. Бодикамералар орқали олинган аудио, видео ёзувлар қанча муддат сақланади?

Аудио, видео ёзувлар қуйидаги муддатларда сақланади:

• жиноятлар бўйича – 5 йил;
• маъмурий ҳуқуқбузарликлар ва назорат текшируви тадбирлари бўйича –
  1 йил;
• жиноят ва ҳуқуқбузарликлар аломатларини ўз ичига олмаган бошқа ҳолатлар бўйича – 1 ой.

Наргиза Шарипова,
"Адолат" МҲАМ ходими