Ҳуқуқий давлат ва кучли фуқаролик жамиятини барпо этишнинг муҳим шарти — бу адолатли, мустақил ва очиқ суд тизимининг мавжудлигидир. Фуқаролик-ҳуқуқий муносабатлар иштирокчилари ўртасида келиб чиқадиган низоларни ҳал этишда суд энг юқори ва якуний инстанция ҳисобланади. Шу сабабли, фуқаролик ишларини судларда кўриб чиқиш тартиби нафақат ҳуқуқшунослар, балки ўз ҳуқуқларини ҳимоя қилмоқчи бўлган ҳар бир фуқаро учун ниҳоятда муҳим ва долзарб мавзудир.

Ўзбекистон Республикасининг Фуқаролик процессуал кодекси фуқаролик ишларини юритишнинг ҳуқуқий асоси бўлиб, унда ишни қўзғатишдан бошлаб, якуний қарор қабул қилингунга қадар бўлган барча босқичлар аниқ белгиланган.

Фуқаролик иши ишда иштирок этувчи шахслар, фуқаролик суд ишларини юритишнинг бошқа иштирокчилари судга тақдим этган ёки суд томонидан талаб қилиб олинган ҳужжатлар ва суд ҳужжатлари асосида суд томонидан шакллантирилади.

Фуқаролик иши электрон шаклда шакллантирилиши мумкин.

Электрон шаклда шакллантирилган фуқаролик ишининг қоғоздаги кўчирма нусхаси бўлиши мумкин.

Фуқаролик иши электрон шаклда шакллантирилган тақдирда, ишда иштирок этувчи шахслар ва фуқаролик суд ишларини юритишнинг бошқа иштирокчилари ҳужжатларни судга электрон шаклда тақдим этишга ҳақли.

Ишда иштирок этувчи шахслар ва фуқаролик суд ишларини юритишнинг бошқа иштирокчилари судга тақдим этган ёзма ҳужжатлар ишга электрон шаклда қўшиб қўйилади, шундан сўнг ёзма ҳужжатлар уларни тақдим этган шахсларга қайтарилади.

Фуқаролик иши электрон шаклда шакллантирилган тақдирда, суд ҳужжатлари судьянинг (судьяларнинг) электрон рақамли имзоси билан тасдиқланади, суд мажлисларининг ҳамда процессуал ҳаракатларнинг баённомалари эса раислик қилувчининг ва суд мажлиси котибининг электрон рақамли имзоси билан тасдиқланади.

Электрон шаклда шакллантирилган фуқаролик ишини бошқа судга ёки ўзга органга ўтказиш ахборот тизими орқали амалга оширилади.

Бекжон Исмаилов,
"Адолат" МҲАМ ходими