Жорий йилнинг 23-август куни Ўзбекистон Республикаси ИИВ биносида Одам савдосига қарши курашиш масалалари бўйича кичик комиссияси – Вазирлик ТҚД ЖҚХ Одам савдосига қарши курашиш бўлими ва АҚШ Халқаро ривожланиш агентлигининг (USAID) ҳамда “Winrock International” халқаро қишлоқ хўжалигини ривожлантириш институти вакиллари ўртасида халқаро ишчи учрашуви бўлиб ўтди. Тадбир давомида одам савдоси соҳасидаги жиноятлар тўғрисидаги маълумотларнинг ягона марказлаштирилган ахборот базасининг самарали фаолият юритишини таъминлаш масалалари муҳокама қилинди. Ягона марказлаштирилган ахборот базаси Ўзбекистон ҳукумати, фуқаролик жамияти ташкилотлари ва халқаро ташкилотларнинг одам савдосига қарши курашиш соҳасидаги ахборот алмашинуви ва биргаликдаги саъй-ҳаракатларини сезиларли даражада яхшилайди. Ягона марказлаштирилган ахборот базасига одам савдоси жабрдийдаларига кўрсатилаётган ёрдам хизматлари тўғрисидаги маълумотлар ҳам киритилади. Ушбу маълумотлар қўллаб-қувватлаш хизматларидаги камчиликларни аниқлашга ва одам савдоси жабрдийдалари учун хизматларни яхшилаш бўйича далилларга асосланган тавсияларни ишлаб чиқишга ёрдам беради. “Маълумотлар базасидан самарали фойдаланишда амалиётчи мутахассисларни тайёрлаш муҳимлигини англаган ҳолда, биз комплекс ўқув дастурини ишлаб чиқдик. Ушбу дастур амалиётчиларга тизимдан самарали фойдаланиш учун зарур кўникма ва билимларни беради. Бугун биз амалиётчиларнинг маълумотлар базасида таҳлилий воситалардан фойдаланишга пухта тайёргарлик кўришлари учун ўқув машғулотларини ҳам ўтказмоқдамиз”, — деди Одам савдосига қарши курашиш масалалари бўйича кичик комиссия масъул котиби – ИИВ ТҚД ЖҚХ Уюшган жиноятчиликка қарши курашиш бошқармаси бошлиғи Наримон Рахимов, ишчи учрашувга якун ясаб. Ушбу ёрдам “Winrock International” халқаро қишлоқ хўжалигини ривожлантириш институти филиали томонидан амалга оширилаётган “Марказий Осиёда хавфсиз миграция” (SMICA) лойиҳаси доирасида тақдим этилди.