Исроилнинг Ғазо секторига жорий йилнинг 7 октабридан бери ҳаво ҳужумлари оқибатида ҳалок бўлган фаластинликлар сони 7028 нафарга етди. Бу ҳақда Ғазодаги Соғлиқни сақлаш вазирлиги маълум қилди. “Исроилнинг Ғазо секторидаги ҳужуми қурбонлари сони 7028 нафарга етди, улардан 2913 нафари болалар, 1709 нафари аёллар ва 397 нафари кексалар. Бундан ташқари, 18484 нафар фуқаро жароҳатланган”, – деган вазирлик матбуот котиби Ашраф ал-Қедра матбуот анжуманида. Унинг сўзларига кўра, Исроил қўшинлари сўнгги 24 соат ичида 43 та қирғин содир этиб, 481 кишини ўлдирган. “Исроил истилоси фаластинлик оилаларга қарши қасддан 731 та қирғин қилди.  Биз бедарак йўқолганлар ҳақида 1650 та хабар олдик, шу жумладан, вайроналар остида 940 нафар бола ҳам бор”, – дея қўшимча қилган у. Унинг сўзларига кўра, Исроил “ёқилғи ва зарур тиббий буюмларнинг кириб келишига ўжарлик билан тўсқинлик қилиш орқали” соғлиқни сақлаш тизимини йўқ қилмоқда. Ал-Қедра “яқинлаб келаётган соғлиқни сақлаш фалокати ҳақида огоҳлантирган. Ғазонинг 2,3 миллион аҳолиси озиқ-овқат, сув, дори-дармон ва ёқилғисиз қолмоқда ва Ғазога киришга рухсат этилган ёрдам карвонларининг фақат бир қисми етказилган.