Мулкдор бўлиш ҳуқуқининг ҳар бир шахсга берилиши шахснинг ҳуқуқий ҳолати ва мақомидан қатъи назар, мол-мулкка эга булиши ва қонунда белгиланган асослар ва тартибдан ташқари, барча ҳолатда мулкдорлик мавқеининг сақлаб қолишини англатади. Хусусий мулк ҳуқуқи муддатсиздир.

Мулкдорга мол­-мулкка эгалик қилиш, ундан фойдаланиш ва уни тасарруф этиш муддати белгиланишига йул қўйилмайди. Шахснинг мулк ҳуқуқини чеклаш, мулкидан маҳрум этиш фақат қонунчиликда назарда тутилган ҳоллардагина амалга оширилиши мумкин.

Фуқаролик кодексида мулк ҳуқуқи шахслар ўз мажбуриятларини бажармаганда суд томонидан уларнинг мажбуриятлари бўйича ундирув уларнинг мол-мулкига қаратилган тақдирда олиб қўйилиши мумкинлиги белгиланган. Бундай ҳолларда мол-мулк мулкдорнинг эрк-иродасига боғлиқ бўлмаган ҳолда ундан олиб қўйилади.

Шунингдек, национализация қилиш, реквизиция ва мусодара қилиш тартибида йўл қўйилиши белгиланган.

«Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида»ги Қонуннинг 17-моддасида хусусий мулк бўлган мол-мулкни, шу жумладан ер участкасини национализация ва реквизиция қилинган ҳолларда олиб қўйиш, агар қонунчиликда бошқача қоида назарда тутилмаган бўлса, мулкдорга унинг бозар қиймати, шунингдек бундай олиб қўйиш муносабати билан мулкдорга етказилган зарарнинг ўрни тўла қопланиши шарти билангина амалга оширилиши белгиланган.

Маъмурий жавобгарлик тўғрисидаги кодекснинг 27-моддасида Маъмурий ҳуқуқбузарликни содир этиш қуроли бўлган ашёни ёки маъмурий ҳуқуқбузарликнинг бевосита ашёсини мусодара қилиш мазкур ашёни ҳақ тўламасдан мажбурий тарзда давлат мулкига ўтказишдан иборат бўлиб, ушбу чора жиноят ишлари бўйича туман (шаҳар) суди томонидан қўлланилади. Ҳуқуқбузарнинг шахсий мулки бўлмаган ашё мусодара қилиниши мумкин эмас, муомаладан чиқарилган ашёлар бундан мустасно.

Шунингдек, ўқотар ов қуролини, пневматик ов қуролини ҳамда унинг ўқ-дориларини, бошқа ов қуролларини мусодара қилиш асосий тирикчилик манбаи овчилик бўлган шахсларга нисбатан қўлланилиши мумкин эмас.

Мулкдор хусусий мулк бўлган мол-мулкини национализация, мусодара ва реквизиция қилиш тўғрисидаги қарор устидан суд тартибида шикоят қилишга ҳақли.