Ҳиндистоннинг марказий олий билим юртларидан бири – Жамия Миллия Исломия университетида ташкил этилган хорижий тиллар халқаро фестивалида ушбу мамлакатда талаба ёшларнинг ўзбек тилини ўрганишга бўлган қизиқиши тобора ортиб бормоқда.

Бугунги кунда ўзбек тилини ўргатиш бўйича курслар Ҳиндистон пойтахтида жойлашган Жамия Миллия Исломия университети, Деҳли университети ва Жаваҳарлаъл Неру университетида йўлга қўйилган.

Халқаро тадбирда Ўзбекистон элчиси Сардор Рустамбоев мамлакатимизда мустақиллик йилларида ҳаётнинг турли жабҳаларида эришилаётган ютуқлар, жумладан, ёшларнинг замонавий таълим олиши, ўз даврининг етук ва илғор мутахассислари бўлиб етишиши учун яратилаётган шароитлар, бу борадаги халқаро ҳамкорлик кўлами ҳақида сўз юритди.

Ўзбекистон ва Ҳиндистон ўртасида олий таълим соҳасидаги сермаҳсул алоқаларга урғу берилди. Ҳинд ёшларига ўзбек тилини ўргатиш бўйича биргаликдаги саъй-ҳаракатлар ўзаро академик алоқаларда алоҳида мавқега эга экани таъкидланди.

– Ўзбекистонда замонавий ҳиндшунослик тарихи қарийб 80 йилга тенг, яъни Ҳиндистон мустақилликни қўлга киритган сана билан боғлиқ, - дейди Тошкент давлат шарқшунослик университети кафедра мудири Нилуфар Хўжаева. – Ҳиндистон университетларида ўзбек тилини ўрганиш бошланганига эса 20 йил тўлаяпти. Шу сабабли мамлакатдаги Ўзбек тили курсларининг тил мутахассислари, ўқув қўлланмалари ва дарсликлар билан таъминланишига кўмаклашиш долзарб вазифа ҳисобланади. Университетимиз ушбу жараёнда фаол қатнашмоқда. Хусусан, Деҳлига ўзбек тили ўқитувчисини юбориш бўйича ташкилий масалалар ҳал этилмоқда, ҳамкорликда таржимонлар ўқувини йўлга қўйишни режалаштирмоқдамиз.

Университет хорижий тиллар департаменти раҳбари профессор Шаҳид Таслим талабаларда ўзбек тилини ўрганишга бўлган иштиёқ катта эканига эътибор қаратиб, икки халқ ўртасидаги тарихий ришталар, Ўзбекистон ҳаётида сўнгги йилларда рўй бераётган катта ўзгаришлар, Ҳиндистон-Ўзбекистон алоқалари турли соҳаларда изчил ривож топаётгани бунга асос бўлаётганини таъкидлади.

Ўзбекистон дипломатик миссияси ва Жамия Миллия Исломия университети вакиллари мазкур олий таълим муассасаси ҳузуридаги Ўзбек тили курслари имкониятларини янада кенгайтириш билан боғлиқ масалалар юзасидан фикр алмашди.

Анжуман иштирокчилари Ҳиндистоннинг Г.Д.Гоенка университетида таълим олаётган ўзбек ёшлари томонидан намойиш этилган бадиий-мусиқий дастурни олқишлар билан кутиб олди.