Лойиҳа натижасида Суренота конида йилига 2,4 млн тонна руда қазиб олиш мумкин бўлади.

Хитойнинг “Limaomaoli Metal Company” компанияси Тошкент вилоятида тоғ-кон комплексини қуради. Бу ҳақда Тоғ-кон саноати ва геология вазирлиги матбуот хизмати хабар берди.

Жорий йилнинг 18 июль куни Паркент туманида жойлашган Суренота тоғ-конь комплексида қурилиш ишлари бошланди.

Мазкур комплексининг ишга тушьирилиши йилига 2,4 млн тонна руда хомашёсини ишлаб чиқариш имконини беради. Мажмуа йилига 1 млн тонна темир руда консентрати ишлаб чиқариш қувватига эга.

Биринчи босқич доирасида лойиҳага $50 млн инвестиция маблағлари йўналтирилади. Унинг натижасида, 400−500та янги иш ўринлари яратилиши кутилмоқда.

Тошкент вилояти ҳокимлиги матбуот хизматининг хабар беришича, конда аниқланган руда заҳиралари 12 йилга етади. Иккинчи босқичда ўнлаб хизмат кўрсатиш обектларини қуриш, кичик корхоналар ташкил этиш кўзда тутилган.

“Limaomaoli Metal Company” 2019 йилнинг ноябрида ташкил этилган. Инвестор темир рудасини қазиб олиш билан шуғулланади ва кичик бизнес сифатида таснифланади. Корхоналарнинг устав капитали 9,64 млрд сўм бўлиб, асосий акциядор (53,6%) ва директори Сонг Липинг ҳисобланади.

Жорий йилнинг май ойида президент ноёб металлар ишлаб чиқариш бўйича янги комбинат ташкил этиш бўйича топшириқ берганди.