Хитойлик инвесторлар Тошкент шаҳрининг Шайхонтоҳур туманидаги реновация дастури доирасида эскирган уй-жойлар ўрнида янги уйлар қуришга $360 млн сармоя киритади. Бу ҳақда президентнинг уй-жой ва “Янги Ўзбекистон” массиви қурилиши бўйича учрашуви ҳақидаги “Ўзбекистон 24” телеканали репортажида маълум қилинди.

Номи қайд этилмаган Хитой компаниялари Оқтепа массивида жойлашган Олим Хўжаев номидаги маҳаллада ободонлаштириш ишларини олиб бормоқда.

Инвесторлар 1960-йилларда қурилган 568 хонадонли 42та икки қаватли уйлар ўрнига 3200 хонадонли кўп қаватли уй-жойлар қуришни режалаштирмоқда.

“Ўзбекистон 24” лавҳасида Хитойдан келган тадбиркорлар қурилиш ишларини буджет ва банк маблағларини жалб қилмасдан амалга ошириши таъкидланган.

27 февраль куни Шавкат Мирзиёев пойтахтда давлат-хусусий шериклик, реконструксияц ва кооператсия шартлари асосида лойиҳаларни амалга оширишнинг соддалаштирилган тартиби тасдиқланаётганини маълум қилганди. Хусусан, инвеститсия лойиҳаларини амалга ошириш мақсадида ўтган йили “Тошкент Инвест” компанияси ташкил этилди.

Пойтахт ҳокими вазифасини бажарувчи Шавкат Умурзоқов Тошкент шаҳрида 500 гектар ҳудуд реконструксия қилинаётгани, бу ерда узоқ муддатга мўлжалланган икки қаватли уйлар ва Сергелида вақтинчалик уйлар жойлашганини маълум қилганди.

Аввалроқ айрим фуқароларга уй қуриш ва таъмирлашга 120 млн сўмгача ипотека кредити ажратилиши маълум қилинганди. Энди пудратчилар рейтинги жорий қилиниб, уларнинг молиявий салоҳиятига минимал талаблар белгиланади.