2024 йил 6 декабрь куни бўлиб ўтган мажлисда Конституциявий суд Ҳукумат ва масъуллар олдига бир қатор ислоҳотларни жадаллаштириш бўйича жиддий талабларни қўйди. Хусусан:

– Конституцияни ўрганиш бўйича Миллий фаолият дастурини қабул қилиш, Асосий қонунимизни ўрганишни болалар боғчасидан бошлаш;

– шахснинг ёзишмалар, телефон орқали сўзлашувлар, почта, электрон ва бошқа хабарларини сир сақлашга бўлган ҳуқуқини чеклашни, уй-жойда тинтув ўтказишни фақат суд қарорига асосан амалга оширишга оид нормаларни қисқа фурсатларда Жиноят-процессуал кодексига киритиш;

– шахснинг сукут сақлашга оид конституциявий ҳуқуқларини жиноят процесси ва маъмурий ҳуқуқбузарликлар бўйича иш юритишда таъминлаш;

– вазирлик ва идораларнинг низомларини қайта кўриб чиқиб, уларда Конституцияни амалга ошириш бўйича ушбу ташкилот масъул бўлган вазифа ва функцияларини аниқ белгилаб қўйиш;

– кам таъминланган шахсларнинг норматив-ҳуқуқий ҳужжатларнинг конституциявийлигини текшириш бўйича мурожаатларини Конституциявий судда кўриб чиқишда давлат ҳисобидан юридик ёрдам тақдим этиш;

– инсон ҳуқуқ ва эркинликларини чекловчи чораларни жорий этишга қаратилган норматив-ҳуқуқий ҳужжатлар лойиҳаларини ишлаб чиқишда конституциявий талабларга риоя этиш;

– барча йирик қурилиш ишларида хавфсизлик кафолатларини ҳамда қурувчи ташкилотлар фаолияти устидан назоратни кучайтириш, реновацияга оид муносабатларни қонун даражасида тартибга солиш;

– тергов ва суд жараёнида вақтинча тергов ҳибсхоналарида сақланаётган шахсларга байрам кунларида озиқ-овқат, кийим-кечак киритиш, тоза ҳавода сайр қилиш, яқин қариндошлари ва адвокатлари билан учрашувга рухсат берадиган тизимни жорий этиш;

– товар ва хизматларнинг эркин ҳаракатланиши бўйича конституциявий кафолатларга сўзсиз риоя этиш;

– халқаро шартномаларнинг Конституцияга мувофиқлигини аниқлаш механизмларини очиб бериш;

– тергов судьяси ваколатларининг қонуний асосларини яратиш чораларини тезлаштириш;

– бошқа шахслар манфаатларида берилган даъволар бўйича давлат божини тўлаш масаласида ҳуқуқий бўшлиқни бартараф этиш.