Тошкенда бўлиб ўтган «Шаҳарсозлик эволюцияси: Ўзбекистон ва Корея инновацион қурилиш йўлида» мавзусидаги халқаро семинар «Ўзбекистон шаҳарсозлик нормалари ва қоидаларини модернизация қилиш» ҳамкорлик лойиҳаси муҳокама қилинди.

Лойиҳаси доирасида амалга оширилган ишлар ҳамда бу орқали маҳаллий қурилиш технологиясини ривожлантириш ва соҳада миллий рақобатбардошликни мустаҳкамлаш юзасидан фикр алмашилди.

Қурилиш ва уй-жой коммунал хўжалиги вазирлиги ҳамда Корея Республикасининг Ер, инфратузилма ва транспорт вазирлиги  ҳамда Корея қурилиш муҳандислиги ва технологиялар институти  ўртасида  «Ўзбекистон шаҳарсозлик нормалари ва қоидаларини модернизация қилиш» бўйича ҳамкорлик меморандуми имзоланган. Ҳамкорлик лойиҳаси бўйича икки томон келишувига кўра 2022-2025 йиллар мобайнида жами 256 та, 2025 йилда 52 та шаҳарсозлик нормалари ва қоидаларини Корея тажрибаси асосида модернизация қилиш белгиланган.

Шаҳарсозлик нормалари ва қоидаларини модернизация қилиш ҳамкорлик лойиҳаси доирасида ишларни самарали ташкил этиш ҳамда лойиҳани муваффақиятли амалга ошириш мақсадида Қурилиш ва уй-жой коммунал хўжалиги вазирлиги ҳузуридаги Техник меъёрлаш ва стандартлаштириш илмий-тадқиқот институтида янги Халқаро нормаларни уйғунлаштириш бошқармаси ташкил этилган.

Мазкур бошқарма Америка, Хитой, Италия, Корея ва мамлакатимизнинг нуфузли олий ўқув юртларида таҳсил олган, малакали, илмий ходимлар билан тўлдирилди. 2022-2024 йиллар оралиғида жами 30 нафар соҳа мутахассиси Корея Республикасида шаҳарсозлик соҳасидаги норматив ҳужжатларни ишлаб чиқиш бўйича малака ва тажриба алмашиб қайтди.

2022 йилдан ҳозирги кунгача 120 дан ортиқ шаҳарсозлик норма ва қоидалари кореялик экспертлар билан биргаликда ўрганиб чиқилди. Ёнғин хавфсизлиги ва бошқа йўналишларга тегишли шаҳарсозлик нормалари ва қоидаларини модернизация қилиш учун таклифлар тайёрланиб, Корея қурилиш тажрибаси миллий шаҳарсозлик нормалари ва қоидаларига уйғунлаштирилмоқда.