“Ғалаба боғи” ёдгорлик мажмуасига мудофаа соҳасида инновацион технологиялар фестивалида янги турдаги маҳсулотлар ўрин олган.  

Бугунги кунда ҳарбий завод ва корхоналаримиз томонидан жанговар техника ва енгил зирҳланган автомобиллар, дронлар, оптика мосламалари ва антидронлар, зирҳлишлем, кимёвий ва зарбга қарши ҳимоя воситалари, шунингдек, икки мақсадга мўлжалланган маҳсулотлар ишлаб чиқарилмоқда.

Юқори даражадаги тадбирда Қуролли Кучларга зарур бўлган замонавий технологиялар – металлургия, кимё саноати ҳамда текстиль соҳасида икки мақсадга мўлжалланган 20 га яқин ишлаб чиқарувчи йирик корхона, 50 та ташкилот, 30 дан ортиқ ишлаб чиқарувчи жисмоний шахслар ва ихтирочилар ўз маҳсулотлари билан иштирок этаяпти.

Инновацион технологиялар маркази директори Азамат Абдусатторов креатив ғояларга асосланган янги турдаги маҳсулотлар билан таништирди.  

–  Бизнинг марказимизда ҳозирги кунда замон талабига жавоб берадиган, ҳарбий хизматчилар учун шахсий ҳимоя воситалари, 15 дан зиёд турдаги маҳсулотлар – баллистик шлемлар, қалқон, ҳимоя нимчалари, шунингдек, учувчисиз учиш аппаратларига қарши курашиш антидрон воситалари ишлаб чиқарилмоқда.

Хорижий ҳамкорлар билан олиб борилаётган ишларимиз натижасида Қуролли Кучларимизни ўзимизнинг маҳаллийлаштирилган маҳсулотлар билан таъминлашга эришилмоқда. Хусусан, тўрт турдаги оптик воситаларни ишлаб чиқариш йўлга қўйилган. Бу йилги режамизда яна тўрт турдаги оптик воситаларни ишлаб чиқариш бор. Шунингдек, ташкилотимизда шахсий ва радиацион ҳимоя воситалари, ҳарбий хизматчилар экипировкалари, ҳарбий ва икки мақсадга мўлжалланган маҳсулотлар ишлаб чиқариляпти. Мазкур тадбир инновацион технологияларни тақдим этишда платформа бўлмоқда.  

Дастурга мувофиқ, етти тур бўйича, яъни робототехника, киберспорт, дронрейсинг, 3D моделлаштириш, дронларни лойҳалаштириш ва дастурлаш бўйича мусобақалар ҳам ўтказилмоқда.