Бу йил халқимиз Ўзбекистон ўз давлат мустақиллигининг 35 йиллигини кенг нишонлайди. Президентимизнинг 2026 йил 1 апрелда қабул қилинган қарорига кўра, айни пайтда юртимизда ушбу тарихий санага қизғин ҳозирлик кўрилмоқда. Бу сана нафақат тарихий байрам, балки мамлакатнинг босиб ўтган тараққиёт йўли, амалга оширилган кенг кўламли ислоҳотлар ва халқ фаровонлигини юксалтириш борасида эришилган натижаларни сарҳисоб қилиш имконияти ҳамдир.

Шу муносабат билан «Ягона Ватан, ягона халқ бўлиб, янги ҳаёт ва келажак яратамиз!» шиори мамлакатимиз мустақиллигининг 35 йиллигига бағишланган бош ғоя сифатида белгиланди. Ушбу ғоя юртимизда яшовчи турли миллат ва элат вакилларининг ҳамжиҳатлиги, тинчлик, тараққиёт ва умумий мақсадлар йўлида бирлашганини ифода этади.

Иқтисодиётда барқарор ўсиш

Сўнгги 35 йил давомида мамлакат иқтисодиёти босқичма-босқич ривожланиб, бозор муносабатларига асосланган янги иқтисодий тизим шаклланди.

Бугунги кунда замонавий саноат тармоқлари ташкил этилди, юзлаб йирик ишлаб чиқариш корхоналари фаолият бошлади, кичик бизнес ва хусусий тадбиркорлик иқтисодиётнинг асосий ҳаракатлантирувчи кучларидан бирига айланди, рақамли иқтисодиёт, электрон давлат хизматлари ва инновацион технологиялар жадал ривожланмоқда, хорижий инвестициялар ҳажми сезиларли даражада ошди.

Натижада юз минглаб янги иш ўринлари яратилди, аҳолининг даромад манбалари кенгайди.

Аҳоли фаровонлиги юксалмоқда

Мустақиллик йилларида инсон қадрини улуғлаш давлат сиёсатининг устувор йўналишига айланди.

Бунинг натижасида янги мактаблар, боғчалар ва олий таълим муассасалари барпо этилди, замонавий шифохоналар ва оилавий поликлиникалар ташкил қилинди, ижтимоий ҳимоя тизими такомиллаштирилди, кам таъминланган оилаларни қўллаб-қувватлаш бўйича янги механизмлар жорий этилди, янги турар жойлар қурилиши кенг қулоч ёйди.

Бугун аҳоли учун давлат хизматларининг аксарияти электрон шаклда кўрсатилмоқда, бу эса вақт ва маблағни тежашга хизмат қилмоқда.

Спортда жаҳон эътирофи

Ўзбекистон мустақиллик йилларида спорт соҳасида ҳам катта ютуқларга эришди.

Юртимиз спортчилари, Олимпия ва Паралимпия ўйинларида тарихий натижаларни қайд этди, жаҳон ва Осиё чемпионатларида юзлаб олтин, кумуш ва бронза медалларини қўлга киритди, бокс, дзюдо, кураш, оғир атлетика, таэквондо, қиличбозлик ва бошқа спорт турларида дунёда муносиб ўрин эгаллади.

Жойларда қурилган замонавий спорт иншоотлари ёшларнинг спорт билан мунтазам шуғулланиши учун кенг имкониятлар яратди.

Инфратузилма ва шаҳарсозликда янги босқич

Мустақиллик йилларида мамлакатнинг қиёфаси тубдан ўзгарди.

Замонавий автомобиль йўллари, темир йўллар, кўприклар, аэропортлар, турар-жой мажмуалари, янги шаҳарчалар ва муҳандислик-коммуникация тармоқлари барпо этилди.

«Яшил макон» умуммиллий лойиҳаси доирасида миллионлаб дарахтлар экилиб, экологик барқарорликни таъминлаш бўйича муҳим ишлар амалга оширилмоқда.

Ёшлар — Янги Ўзбекистоннинг таянчи

Ёшларнинг билим олиши, касб эгаллаши ва ўз иқтидорини намоён этиши учун кенг имкониятлар яратилди.

Президент мактаблари, ижод мактаблари, янги университетлар, замонавий IT-парклар ва инновацион марказлар мамлакат интеллектуал салоҳиятини оширишга хизмат қилмоқда.

Ёшларни қўллаб-қувватлаш бўйича давлат дастурлари орқали минглаб лойиҳалар молиялаштирилиб, уларнинг тадбиркорлик фаолияти рағбатлантирилмоқда.

Ягона мақсад йўлида

«Ягона Ватан, ягона халқ бўлиб, янги ҳаёт ва келажак яратамиз!» шиори бугунги Янги Ўзбекистоннинг мазмун-моҳиятини ўзида мужассам этади.

Бу ғоя халқимиз бирлиги, меҳнатсеварлиги ва Ватан тараққиёти йўлидаги умумий интилишларини акс эттиради. Мустақилликнинг 35 йили давомида эришилган ютуқлар мамлакатнинг барқарор тараққиёти учун мустаҳкам замин яратди. Эндиги вазифа — ушбу ислоҳотларни изчил давом эттириб, иқтисодий қудрати янада юксак, аҳолиси фаровон ва келажаги порлоқ Ўзбекистонни барпо этишдир.

Феруз Жўраев