Солиқ тўловчи ва солиқ органи ўртасида тузиладиган нархни белгилаш тўғрисидаги битим солиққа тортиш шартларини аниқ белгилаб беради. Бироқ мазкур битим айрим ҳолларда ўз кучини йўқотиши ёки муддатидан олдин бекор қилиниши мумкин. Солиқ кодексининг 201-моддасида ушбу жараённинг тартиби белгилаб қўйилган.

1-факт: Битим муддати тугаши билан бекор бўлади

Битим белгиланган амал қилиш муддати якунлангач, автоматик равишда тугатилади ва қўшимча қарор талаб этилмайди.

2-факт: Солиқ мажбуриятлари бузилса, муддатидан олдин бекор қилинади

Агар солиқ тўловчи битим шартларини бузиб, солиқларнинг тўлиқ тўланмаслигига сабаб бўлса, Давлат солиқ қўмитаси раҳбари ёки унинг ўринбосари қарори билан битим муддатидан илгари тугатилади.

3-факт: Келишув ёки суд қарори асос бўлиши мумкин

Битим тарафларнинг ўзаро келишувига кўра ёки суд қарори асосида ҳам муддатидан олдин бекор қилиниши мумкин.

4-факт: Қарор расмий тартибда етказилади

Битимни тугатиш ҳақидаги қарор солиқ тўловчига тилхат асосида топширилади ёки қарор қабул қилинган кундан эътиборан 5 кун ичида буюртма хат орқали юборилади. Пошта орқали юборилган қарор 5 кун ўтгач олинган деб ҳисобланади.

5-факт: Судга шикоят қилиш ҳуқуқи мавжуд

Солиқ тўловчи ушбу қарордан норози бўлса, қонунчиликда белгиланган тартибда судга мурожаат қилиши мумкин.