Бугунги кунда ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш Вазирлар Маҳкамасининг 2017 йил 5 декабрдаги 965-сон қарори асосида амалга оширилмоқда. Лекин ушбу Қарордаги бир қатор нормалар Ўзбекистон Республикасининг Меҳнат кодекси ва “Аҳоли бандлиги тўғрисида”ги қонунига мувофиқ келмаслиги аниқланган.
 
Шу туфайли мазкур қарорнинг янги лойиҳасини ишлаб чиқиш зарурати вужудга келиб, айни дамда қарорнинг янги таҳрирдаги лойиҳаси (ID-95253) regulation.gov.uz порталида муҳокамага қўйилган.
 
Хусусан, оилавий (маиший) зўравонлик натижасида жабрланганлар аҳолининг ижтимоий эҳтиёжманд тоифаси сифатида юқоридаги Қарорга қўшилмоқда. Бунинг натижасида аҳолининг ижтимоий эҳтиёжманд тоифалари учун иш ўринларининг энг кам сонини белгилаш тўғрисидаги туманлар (шаҳарлар) ҳокимларининг қарорларида ушбу тоифа қамраб олинади ва улар ҳам ишга жойлашишда захираланган иш ўринларидан фойдаланиш имкониятига эга бўладилар.
 
Маълумот учун, Ўзбекистон Республикаси Президентининг “Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида” 2023 йил 21 декабрдаги ПҚ-401-сон қарорида 2024 йил 1 январдан бошлаб ташкилот (иш берувчи) томонидан иш ўринлари захирага қўйиладиган ижтимоий ҳимояга муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахслар тоифаларига оилавий (маиший) зўравонлик натижасида жабрланганлар ҳам киритилиши лозимлиги белгиланган.