Ортиқча тўланган солиқ суммасини солиқ тўловчига қайтариш муддати бузилганда, қайтариш муддати бузилган ҳар бир календарь кун учун фоизлар ҳисобланади.

 

1. Ортиқча тўланган ёки ундирилган солиқ суммаси қайтариладими?

Солиқ тўловчи томонидан ортиқча тўланган ёки ундан ортиқча ундирилган солиқ солиқ тўловчининг қарзи бўлмаганда шу солиқ тўловчига қайтарилиши ёхуд ушбу солиқ бўйича келгуси тўловлар ҳисобига қайд қилиниши лозим.

Cолиқ тўлови ортиқча тўланган бўлса, солиқ тўловчи қуйидагиларни амалга ошириши мумкин:

— бошқа солиқ тўловлари бўйича мавжуд қарздорликни тўлашга йўналтириш (ортиқча тўланган суммаларини ҳисобга олиш);

— ортиқча тўланган суммани қайтаришни талаб қилиш.

Ортиқча тўланган ёки ундирилган солиқ қуйидаги кетма-кетликда ҳисобга олинади:

— мазкур солиқ турининг пеняси бўйича қарз ҳисобига;

— бошқа солиқлар ва уларнинг пенялари бўйича қарзни узиш ҳисобига;

— солиққа оид ҳуқуқбузарликлар учун жарималарни тўлаш ҳисобига.

2. Ортиқча тўланган солиқни солиқ қарзига ўтказиш тартиби қандай?

Солиқ бўйича қарзини қоплаш ҳисобига солиқ тўловчи томонидан ортиқча тўланган суммани ҳисобга олиш солиқ органлари томонидан мустақил равишда амалга оширилади.

Ортиқча тўланган солиқни солиқ қарзини қоплашга ўтказиш тўғрисидаги қарор солиқ органи томонидан солиқнинг ортиқча тўланганлиги аниқлагандан ёки солиқ тўловчи билан ўзаро солиштириш далолатномаси имзолангандан ёхуд суднинг қарори кучга киргандан 10 кун ичида қабул қилинади.

3. Ортиқча тўланган солиқ қанча муддатда қайтариб берилади?

Ортиқча тўланган солиқ суммасини қайтариш тўғрисидаги қарор солиқ органи томонидан солиқ тўловчининг аризаси олинган кундан 10 кун ичида, Тадбиркорлик субъектларининг юқори барқарорлик рейтингига эга бўлган тадбиркорларга эса 2 кун ичида қабул қилинади.

Ортиқча тўланган солиқ суммаси солиқ тўловчига ёзма аризасига кўра, 15 кун ичида, Тадбиркорлик субъектларининг юқори барқарорлик рейтингига эга бўлган тадбиркорларга эса 3 кун ичида қайтарилиши лозим.

Солиқ органи ортиқча тўланган солиқ суммасини ҳисобга олишни ёки қайтаришни рад этиш тўғрисидаги қабул қилинган қарор ҳақида солиқ тўловчига 3 кун ичида хабар қилиши шарт.

4. Ортиқча тўланган солиқ бўйича қанча муддатда ариза бериш мумкин?

Ортиқча тўланган солиқ суммасини ҳисобга олиш ёки қайтариш тўғрисидаги ариза кўрсатилган сумма тўланган кундан 3 йил ичида берилиши мумкин.

5. Ортиқча тўланган солиқ вақтида қайтарилмаса қандай чора кўрилади?

Ортиқча тўланган солиқ суммасини солиқ тўловчига қайтариш муддати бузилганда, қайтариш муддати бузилган ҳар бир календарь кун учун фоизлар ҳисобланади. Ҳисобланган фоизлар тегишли бюджет маблағлари ҳисобидан тўланади. Фоиз ставкаси қайтариш муддати бузилган кунларда амал қилган Марказий банкнинг қайта молиялаштириш ставкасига тенг этиб қабул қилинади.

 

Hudud24.uz колумнисти

Дилмурод Ражабоев