Bloomberg глобал миқёсда ва Қўшма Штатларда пластмасса ишлаб чиқариш ва утилизация қилишдан чиқадиган карбонат ангидрид чиқиндиларининг ўсиш суръатларини таҳлил қилди, шунингдек, ушбу чиқиндиларни камайтиришнинг мумкин бўлган ечимлари ҳақида мутахассислар билан суҳбатлашди.

БМТнинг Атроф-муҳит бўйича дастурига кўра, 1950 йилларда дунё ҳар йили 2 миллион метрик тонна (мт) модда ишлаб чиқарган. Ҳозирда бу рақам 400 млн. мт.дан ошди.

Агар жорий ишлаб чиқариш ўзгаришсиз қолса, 2050 йилга келиб йиллик пластмасса ишлаб чиқариш 1,1 миллиард мт.га етиши мумкин.

Иқтисодий ҳамкорлик ва тараққиёт ташкилоти (OECD) маълумотларига кўра, пластмасса 2019 йилда 1,8 млрд мт иссиқхона газлари эмиссиясини ташкил этди. Бу глобал ҳажмнинг 3,4%ни ташкил этади, бу авиация сектори томонидан чиқарилган CО2 улушидан кўпроқдир.

1995 йилдан бери пластмасса саноатининг глобал углерод изи икки баравар ошгани тахмин қилинмоқда, чунки ишлаб чиқариш Ҳиндистон, Хитой ва Индонезия каби кўпроқ кўмир ишлатадиган мамлакатларга ўтди.

Пластмасса табиий материаллар каби биологик парчаланмайди, лекин у бузилади. Атроф муҳитда пластмасса парчаланиши билан унинг сирт майдони ошади ва чиқарилган газ миқдори экспонент равишда кўпаяди.