Тошкент Фотосуратлар уйида илк маротаба Матбуот ва оммавий ахборот воситалари ходимларига кунига бағишланган “Ўзбекистон матбуоти архив ҳужжатларида” номли архив ҳужжатлари фотокўргазмаси ташкил этилди.

Кўргазмада Ўзбекистон Кинофотофоно ҳужжатлари миллий архивида сақланаётган 1928-2021-йилларга оид, Ўзбекистон Миллий Ахборот агентлиги томонидан тақдим этилган Ўзбекистонда Матбуот ва оммавий ахборот воситаларининг ривожланишини акс эттирувчи 150 дан ортиқ фотоҳужжатлар намойиш этилди.

Экспонатларда ОАВ ҳақидаги маълумотлар, архив ҳужжатлари, фотоматериаллар илк бор намойиш этилмоқда. Кўргазмада даврий нашрлар таҳририятларининг ижодий учрашувлари, босмахоналар фаолияти, интервью ва суҳбатлар, республика марказий ва ҳудудий, маҳаллий газета, журналлар ҳамда телерадио студияларининг иш жараёнлари, теледастур ва эшиттиришлар тайёрлаш, материаллар устида ишлаш, тасвирга олиш ва овоз ёзиш жараёнлари, телевидение ва радиода фаолият бошлаган биринчи сухандонлар, режиссёр ва операторларнинг фаолияти ёритилган.

Тадбирнинг тантанали очилиш маросимида “Ўзархив” агентлиги, Ўзбекистон Бадиий Академияси, Ўзбекистон Ахборот агентлиги Ўзбекистон миллий архивлари раҳбарлари ва ходимлари, вазирлик ва идоралар матбуот котиблари, ОАВ вакиллари иштирок этишди.