"Шарқ дурдонаси" бўлган Ўзбекистон сайёҳлик салоҳияти, табиати, қадимий ёдгорликлари, музейлари, соғломлаштириш масканлари, меъморий обидалари билан ҳар йили кўплаб сайёҳларни ўзига жалб этаяпти, – дейилади нашр муқаддимасида. – Туризм кўрсатгичларида давлат дастурларини ишлаб чиқиш ва туристик объектлар билан таъминлаш эса янги ёндашувни талаб қилади".

Қайд этилишича, ушбу мақсадларга эришиш учун Ўзбекистон Президентининг "Туризм йўналишидаги ислоҳотларни янада жадаллаштириш ва соҳада давлат бошқаруви тизимини самарали ташкил қилиш чора-тадбирлари тўғрисида"ги қарори қабул қилинди.

"Ҳужжатга биноан, 2026 йил 31 декабргача фойдаланишга топширилиши шарти билан, баландлиги камида беш қаватли янги меҳмонхоналарни қуриш ва жиҳозлаш учун инвесторлар харажатларининг бир қисмини қоплаш тизими жорий этилади. Бундан ташқари, мутахассисларнинг малакасини ошириш ва туризм соҳасида халқаро стандартларга жавоб берадиган юқори малакали кадрлар тайёрлашни қўллаб-қувватлаш ҳамда Топ-100 та жаҳон рейтингида бўлган ва халқаро миқёсда эътироф этилган таълим дастурларини жалб этиш назарда тутилган", – дея таъкидланган материалда.

Уч йиллик дастурлар ва "модулли" тизим асосида ҳамда дуал таълим шаклида кадрлар тайёрлаш тизимини яратиш режалаштирилмоқда. Бунинг учун, 2023-2024 ўқув йилидан бошлаб, "Ипак йўли" туризм ва маданий мерос халқаро университетига Шанхай ҳамкорлик ташкилоти ва ушбу тузилмага аъзо мамлакатлар ҳамда туркий давлатларнинг, шунингдек, Буюк ипак йўли бўйидаги мамлакатларнинг фуқароларини ўқитиш учун ҳар йили давлат бюджетидан камида 834 минг доллар ажратилади.

"Ҳозирги пайтда Ўзбекистоннинг барча сайёҳлик шаҳарларида спорт туризми, ихтисослаштирилган тиббиёт марказлари, меҳмонхоналар, умумий овқатланиш шохобчалари, савдо марказлари, алоқа ва транспорт хизматлари кўрсатиш учун шароит яратиш ҳамда кенг кўламли қурилиш ва ободонлаштириш ишлари режалаштирилган", – деб қайд этилган мақола охирида.