27 октябрь куни бўлиб ўтган Ўзбекистон Республикаси Олий Мажлиси Қонунчилик палатаси, Қорақалпоғистон Республикаси Жўқорғи Кенгеси, Халқ депутатлари вилоят ва Тошкент шаҳар, туман ва шаҳар Кенгашларига сайловлар жараёни очиқлик, ошкоралик ва шаффофлик асосида ўтказилди.

Сайлов қонунчилигидаги ўзгаришларга кўра, бу галги сайловда номзодларнинг 40 фоизи аёллардан иборат бўлиши лозимлигига оид норма номзод кўрсатиш давомида таъминланди.   

Сайловнинг якуний натижаларига кўра, Олий Мажлис Қонунчилик палатасига янгидан сайланган депутатларнинг 38 фоизини хотин-қизлар ташкил этади. Бу Ўзбекистон тарихида энг юқори кўрсаткич бўлди. Аввалги чақириқда аёл депутатлар 32 фоизни ташкил этган эди. Демак, бу сафар ушбу кўрсаткич 6 фоизга кўп.   

Қорақалпоғистон Республикаси Жўқорғи Кенгеси, халқ депутатлари вилоят, Тошкент шаҳар ва туман (шаҳар)лар Кенгашларига сайлов натижаларига кўра, янги сайланган депутатларнинг 32,6 фоизи хотин-қизларни ташкил қилди.   

Бундан ташқари, сайланган депутатлар орасида мамлакатимизда яшаётган бошқа миллат вакиллари ҳам бор. Улар 12,7 фоизни ташкил қилади.