Саудия Арабистонида ҳаж зиёратчиларига хизмат кўрсатиш учун ҳаво таксиси хизмати ишга туширилади. Бу ҳақда қироллик ҳукумати тарқатган хабарларга таяниб, Al Arabiya хабар берди.

Саудия расмийлари 12 июнь куни учар таксининг биринчи синовини амалга оширган. Барча назорат текширувлари амалга оширилгач, ҳаво таксиси лойиҳаси Макка шаҳрида жорий қилиниши айтилган.

ЭҲ216-С эВТОЛ русумли ҳаво дрони йўловчи ташиш учун йўлга қўйилиши режалаштирилмоқда. Дроннинг биринчи синов парвози Саудия Арабистони транспорт ва логистика хизматлари вазири Солиҳ ал-Жассир ва фуқаро авиацияси бош бошқармаси президенти Абдулазиз ал-Дуайлеж иштирокида кузатилган.

“Синов ҳаво таксиси ҳаж мавсумида хизмат кўрсатиши мумкинлигига ишонч ҳосил қилиш учун ўтказилди”, — деган Солиҳ ал-Жассир эълон қилган баёнотида.

Хабарда айтилишича, “учар такси” икки кишини кўтариб уча олади. У барча хавфсизлик параметрларига мос равишда ишлаб чиқарилган бўлиб, электр қуввати ёрдамида 40 километргача масофага уча олади.

Расмийлар ушбу хизматни ривожлантириш учун навбатдаги синовлар ва тажрибалар ўтказилишини билдирган. Учиш масофаси узоқлигини кўпайтириш борасида ўрганишлар давом этаётгани айтилган.

Саудия матбуот агентлиги (СПА) томонидан эълон қилинган Транспорт бош бошқармаси баёнотига кўра, ҳаво такси хизмати зиёратчиларни муқаддас қадамжолар ўртасида ташиш, фавқулодда саёҳатларни осонлаштириш, тиббий асбоб-ускуналарни ҳаво билан етказиш ва юкларни ташиш учун логистика хизматларини кўрсатишни мақсад қилган.

Маълумот ўрнида, жорий йилда Саудия Арабистонида ҳаж мавсуми 14 июнь куни бошланиши белгилаб қўйилган эди. Бу йилги мавсумда 1,5 миллион нафардан ортиқ зиёратчи Саудия Арабистонига ташриф буюрган.