Президент қарори билан Қорақалпоғистон Республикасининг Қўнғирот туманида Саудия Арабистонининг “ACWA Power” компанияси томонидан ҳар бирининг қуввати 500 МВт бўлган шамол электр станцияси ҳамда қуввати 100 МВт бўлган электр энергиясини сақлаш тизимини ҳамда ҳаво электр узатиш тармоғини барпо этиш бўйича иккита лойиҳа маъқулланди. Бунинг учун масъулияти чекланган жамият шаклидаги Kungrad Wind 2 ва Kungrad Wind 3 қўшма корхоналари ташкил этилди. Инвестор ҳар бир лойиҳа доирасида рискларни ўз бўйнига олган ҳолда 667 млн долларлик тўғридан-тўғри сармоя жалб қилади. Ўзбекистон эса ишлаб чиқарилган электр энергиясини кафолатли сотиб олади. Инвестор шамол электр станциясини ягона тармоққа улаш учун подстанция қуради, электр симларини тортади. Сўнг уларни “Ўзбекистон миллий электр тармоқлари” АЖга топширади. Янги подстанция ва ҳаво электр узатиш тармоқлари учун сарфланган харажатлар 10 йил давомида қоплаб берилади.