Спинал мушак атрофияси (СМА) ташхиси қўйилган болалар доимий парвариш ва махсус тиббий ёрдамга муҳтож бўлади. Айрим ҳолатларда даволаниш жараёнини уй шароитида давом эттириш учун махсус тиббий жиҳозлардан фойдаланиш талаб этилади.

Шу боис давлат томонидан СМА ташхиси қўйилган болаларни уйда даволаниш учун зарур тиббий жиҳозлар билан таъминлаш тартиби белгиланган. Қуйида ушбу ҳуқуқдан кимлар фойдаланиши, жиҳозлар қандай тартибда берилиши ва бунинг учун қаерга мурожаат қилиш лозимлиги ҳақида маълумот берилади.

Ҳукумат қарори (184-сон, 17.04.2026 й.) билан “Спинал мушак атрофияси ташхиси қўйилган болаларни уй шароитида даволаниш учун зарур бўлган тиббий жиҳозлар, протез-ортопедия мосламалари ва реабилитация қилишнинг техник воситалари билан таъминлаш тартиби тўғрисида”ги низом тасдиқланди.

Низомга кўра, бемор болаларнинг ота-оналари яшаш жойларидаги туман (шаҳар) тиббиёт бирлашмасига болаларни уй шароитида даволаш тўғрисидаги ариза билан мурожаат қилади.

Аризага якуний ташхис қўйилган тиббий хулоса, бемор болаларга тавсия этилган зарур тиббий жиҳозлар рўйхати илова қилинади.

Ариза ҳудудий ишчи гуруҳ томонидан 10 кун ичида кўриб чиқилади.

Ҳудудий ишчи гуруҳ кейинги йил учун зарур тиббий жиҳозларга бўлган эҳтиёжни ҳар йил 1 июнгача республика ишчи гуруҳига электрон шаклда тақдим этади.

Республика ишчи гуруҳи зарур тиббий жиҳозлар рўйхатини умумлаштириб, 15 июнгача Соғлиқни сақлаш вазирлигига тақдим этади.

Вазирлик келгуси йилнинг 1 июнигача уй шароитида даволаниш учун зарур тиббий жиҳозларни қонунчиликка мувофиқ харид қилиш чораларини кўради.

Тиббий жиҳозлар ҳар йили 1 июлга қадар республика ишчи гуруҳи томонидан тақсимот асосида ҳудудларга тарқатилади.

Жиҳозлар ҳудудий ишчи гуруҳ томонидан етказиб берувчи ташкилотдан қабул қилиб олингандан кейин 10 кун ичида тегишли туман (шаҳар) тиббиёт бирлашмалари вакили иштирокида муҳтож бемор боланинг ота-онаси ёки қонуний вакилига шартнома асосида топширилади.

СМА ташхиси қўйилган болаларни зарур тиббий жиҳозлар билан таъминлаш уларнинг соғлиғини сақлаш ва ҳаёт сифатини яхшилашга қаратилган муҳим қадамдир. Агар фарзандингизга ушбу ташхис қўйилган бўлса, белгиланган тартибда тиббиёт муассасасига мурожаат қилиб, уйда даволаниш учун зарур жиҳозларни олиш ҳуқуқингиздан фойдаланишингиз мумкин.