Сўнгги йилларда талаба-ёшларни қўллаб-қувватлаш ва уларнинг таълим олиш жараёнида дуч келадиган молиявий қийинчиликларини камайтириш мақсадида турли ижтимоий дастурлар жорий этилмоқда. Шундай ташаббуслардан бири – талабаларнинг турар жой масаласини енгиллаштиришга қаратилган ижара тўловларини қоплаб бериш тизимидир. Мазкур механизм орқали олий таълим муассасаларида таҳсил олаётган талабалар учун уй-жой билан боғлиқ харажатларнинг бир қисми давлат томонидан қопланади.

Талабаларга ижара тўлови тўлаб бериш тизими, айниқса, талабалар турар жойлари етарли бўлмаган ҳудудларда муҳим аҳамият касб этади. Бу нафақат талабаларнинг яшаш шароитини яхшилашга, балки уларнинг асосий эътиборини таълим олишга қаратишига ҳам хизмат қилади. Шу билан бирга, мазкур тизим ёшларнинг ижтимоий ҳимоясини кучайтириш ва олий таълимга бўлган имкониятларни кенгайтиришда муҳим омил ҳисобланади.

Талабаларга ижара тўловининг бир қисмини қоплаб бериш тартиби белгиланган. Бунда ижара ҳуқуқи асосида яшайдиган талабаларнинг ойлик ижара тўлови бир қисмини қоплаб бериш давлат солиқ хизмати органлари томонидан ҳисобга қўйилган кўчмас мулк ижара шартномасига мувофиқ ижара ҳуқуқи асосида яшайдиган ариза берувчиларга нисбатан татбиқ этилади.

Рўйхатга олинган доимий яшаш жойи доирасида (туман, шаҳар миқёсида) ариза берувчиларга ойлик ижара тўловининг бир қисмини қоплаб бериш амалга оширилмайди.

Битта турар жойда икки ва ундан ортиқ талаба ижара ҳуқуқи асосида яшаган ҳолатларда, уларнинг барчаси ижара шартномасида қайд этилган бўлишлари шарт.

Давлат олий таълим муассасаларининг фақат кундузги таълим шаклида (хорижий ҳамкор олий таълим ташкилотларининг қўшма таълим дастурлари асосида ва факультетларида таълим олаётган талабалардан ташқари), давлат гранти ёки тўлов-контракт асосида таҳсил олишидан қатъи назар, ижара ҳуқуқи асосида яшайдиган талабаларнинг 60 фоизига Ўзбекистон Республикаси Давлат бюджети ҳисобидан қоплаб берилади.

Ариза берувчи мустақил равишда анкета-аризани икки нусхада тўлдириб, ижара шартномаси нусхаси билан ўзи таълим олаётган факультетнинг ёшлар билан ишлаш бўйича декан ўринбосари ёки олий таълим муассасасининг талабаларни турар жой билан таъминлаш ишларини мувофиқлаштирувчи бўлимига топширади.

Бунда ариза берувчи мазкур бандда келтирилган ҳужжатларга қўшимча равишда ўзининг ижтимоий ҳолати тўғрисидаги маълумотномаларни (агар мавжуд бўлса) илова қилиши лозим.