Навоий вилоятининг Томди тумани ҳокими ўз аризасига кўра лавозимидан озод қилинди. Бу ҳақда вилоят ҳокимлиги хабар берди.

Қайд этилишича, кеча, 23 декабрь куни халқ депутатлари Томди тумани кенгашининг навбатдан ташқари олтмиш учинчи сессияси бўлиб ўтган.

Сессия ишида Навоий вилояти ҳокими сўзга чиқиб, Қайрат Алдабергеновни туман ҳокими лавозимидан озод этиш тўғрисида қабул қилинган вилоят ҳокимининг қарорини ўқиб эшиттирган.

Ушбу қарор халқ депутатлари Томди тумани Кенгаши депутатлари томонидан маъқулланган.

Томди тумани ҳокими вазифасини вақтинча бажариш туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Орзумурод Умаров зиммасига юклатилган.

Маълумот учун, Қайрат Алдабергенов 1966 йили Навоий вилояти Нурота туманида туғилган. Миллати - қозоқ. 1988 йилда Тошкент халқ хўжалиги институтини тамомлаган, 2000 йилда Ўзбекистон Республикаси Банк Молия академиясини тугатган. У туман ҳокими лавозимда 2009 йилдан буён ишлаб келаётганди.