Пойтахт ҳокимлиги тирбандликлар ва аҳоли норозилигига сабаб бўлаётган йўл таъмирлаш ишлари қачон якунланишини маълум қилди. Қайд этилишича, айни кунларда Бобур ва Нукус кўчаларида йўл таъмирлаш ишлари олиб борилмоқда. Ишлар доирасида асфальт қопламасини янги технологиялар асосида янгилаш, янги йўл усти белгиларини чизиш, ҳудудга қўшимча дарахт ва буталар экилиши кўзда тутилган. Бўлиб ўтаётган кенг кўламли йўл таъмирлаш ишлари аҳоли норозилигига, тирбандликларга сабаб бўлди. Шу билан бирга, ёғингарчиликлар сабабли ҳамда кундузги тирбандликларни бироз камайтириш мақсадида ишлар асосан тунги соатларда амалга оширилмоқда. Маълум қилинишича, мазкур жараён ҳокимликнинг қатъий назоратида ва ишлар якунланиши 2–3 ноябрь кунларига режалаштирилган.