Бундан ташқари, пойтахт жамоат транспорти учун 200 та электробус ҳамда қувватлаш ускуналари олиб келинади.

Аввалроқ 2025 йил учун давлат дастури лойиҳаси ишлаб чиқилиб, жамоатчилик муҳокамасига қўйилгани ҳақида хабар берилганди.

Ҳужжат билан мамлакатда жамоат транспортининг экологик тоза ёқилғига ўтказилишини тезлаштириш режалаштирилмоқда.

Хусусан, Тошкент шаҳрида трамвай линиясини қуриш лойиҳаси бўйича техник-иқтисодий асослаш (ТИА) ни ишлаб чиқиш таклиф этилмоқда.

Лойиҳа халқаро молия институтлари маблағлари ҳисобидан 2025-йилнинг сентябригача амалга оширилиши керак.

Бундан ташқари, жорий йилда пойтахт жамоат транспорти учун 200та электробус ҳамда улар учун қувватлаш ускуналари олиб келинади.

Нукус ва Наманган шаҳарларининг ҳар бирига 50тадан, Самарқанд шаҳрига эса 250та электробус олиб келиш, қувватлаш ускуналарини харид қилишни назарда тутувчи лойиҳаларнинг TIA ни ишлаб чиқиш белгиланмоқда. Лойиҳа жорий йилнинг августигача тайёрланади.

Шунингдек, ноябргача “Урганч-Хива” йўналишига янги 10та троллейбусларни харид қилиш чоралари кўрилади.

Тошкент шаҳрида трамвай ҳаракати 2016 йил май ойи бошида тўхтатилган. Бу мавзу шу кунгача муҳокама қилиниб келинмоқда. 2022 йил бошида президент пойтахтга трамвайни қайтариш режаларини маълум қилди. 

Ўша йилнинг ноябрида эса Франциянинг “Alstom” компанияси Тошкентда трамвай йўлларини қуриши маълум бўлди. Лойиҳа қиймати 167,4 млн еврога баҳоланган бўлиб, линиялардан бири “Дўстлик” метро бекатидан бошланиб, “Янги Ўзбекистон” кўчаси бўйлаб ўтиши мумкин эди.