Меҳнат муносабатларида иш вақтининг ҳуқуқий тартибга солиниши ходимларнинг соғлиғини муҳофаза қилиш, уларнинг меҳнат шароитларини яхшилаш ҳамда адолатли иш режимини таъминлашда муҳим аҳамият касб этади. Айниқса, тунги вақтда бажариладиган ишлар ходим организмига юқори даражада юклама бериши билан ажралиб туради. Шу боис, қонунчиликда тунги вақтдаги ишнинг давомийлиги, унга жалб этиш шартлари ҳамда чекловлар алоҳида тартибда белгиланган.

Соат 22-00 дан то соат 6-00 гача бўлган вақт тунги вақт ҳисобланади.

Агар ходим учун белгиланган ҳар кунги иш (смена) давомийлигининг камида ярми тунги вақтга тўғри келса, тунги вақтдаги ишнинг давомийлиги иш ҳафтасининг давомийлиги тегишли равишда қисқартирилган, кейинчалик ишлаб берилмаган ҳолда бир соатга қисқартирилади.

Агар жамоа шартномасида бошқача қоида назарда тутилмаган бўлса, иш вақтининг қисқартирилган давомийлиги белгиланган ходимлар учун, шунингдек тунги вақтда ишлашга махсус қабул қилинган ходимлар учун тунги вақтдаги ишнинг (сменанинг) давомийлиги қисқартирилмайди.

Меҳнат шароитларига кўра зарур бўлган ҳолларда, шунингдек олти кунлик иш ҳафтасидаги сменали ишларда тунги вақтдаги ишнинг давомийлиги кундузги вақтдаги ишнинг давомийлиги билан тенглаштирилади. Мазкур ишлар рўйхати жамоа шартномасида, агар у тузилмаган бўлса, иш берувчи томонидан касаба уюшмаси қўмитаси билан келишувга кўра белгиланиши мумкин.

Бекжон Исмаилов,
"Адолат" МҲАМ ходими