Куни кеча, 15 октябрь куни Таиланднинг Бангкок шаҳрида Осиё бокс конфедерациясининг навбатдан ташқари конгресси бўлиб ўтди. Ушбу Конгрессда кун тартиби бўйича Осиё бокси атрофидаги турли масалалар кўриб чиқилиши билан биргаликда, 2022 йилда Осиё минтақасида бўлиб ўтган барча мусобақалар ҳисоботлари тақдим этилди. Эътиборлиси, Ўзбекистон бокс федерацияси, ўтган 2022 йил ҳисобидан медаллар жамғариш бўйича Осиё қитъасининг “Йил федерацияси” дея тан олинди ва Осиё бокс конфедерацияси томонидан махсус мукофоти топширилди. Ушбу мукофотни Ўзбекистон бокс федерацияси раиси маслаҳатчиси Малик Бабаев қабул қилиб олди. Қайд этиш мумкин, Хитойнинг Ханчжоу шаҳрида ўтказилган 19-Осиё ўйинларида қатнашган Ўзбекистон боксчилари 3 та олтин ва 2 та бронза медалини делегациямиз ҳисобига қўшиб қўйишган эди.