Сўнгги йилларда мамлакатимизда банк тизимини ривожлантириш доирасида қатор салмоқли ишлар амалга оширилди. Энг асосийси, банк тизимини ривожлантиришда туб ўзгаришларни амалга оширишга қаратилган “2020– 2025 йилларга мўлжалланган Ўзбекистон Республикаси банк тизимини ислоҳ қилиш стратегияси” қабул қилинди.

Банкларни хусусийлаштиришга тайёрлаш, уларни “IPO”га чиқариш, соҳага тажрибали хорижий мутахассисларни жалб қилиш бўйича бир қатор вазифалар белгиланди.

Соҳада амалга оширилган ислоҳотлар натижасида сўнгги 5 йилда банк тизимида активлар қарийб 4 бараварга (622 трлн сўмгача), депозитлар – 3,7 бараварга (220 трлн сўмгача), банклар капитали – 4,4 бараварга (90,6 трлн сўмгача) ошди.

Ушбу даврда 13 та янги хусусий банклар ташкил этилди, мамлакатимизга хориждан нуфузли банклар (ОТП банк, TBC банк, Тенге банк) кириб келди, 7 та рақамли банклар (Узум банк, TBC банк, Анор банк, Апекс банк, Смарт банк, Янги банк, Ҳаёт банк) фаолият юритмоқда, онлайн банк хизматлари ҳажми 2,7 баробарга кўпайди.

Стартегияни амалга ошириш натижасида банк хизматларини кўрсатиш нуқталари 2021 йилдаги 13 783 тадан 2023 йилда 26 781 тагача, банк ҳисобварағига эга катта ёшли аҳоли улуши 57 фоиздан 78 фоизгача, муомаладаги фаол банк карталари сони 26 млн донадан 41 млн донагача, банк карталари орқали амалга оширилган транзакциялар суммаси 134 трлн сўмдан 225 трлн сўмгача, электрон пуллар орқали амалга оширилган транзакциялар суммаси 22 млрд сўмдан 858 млрд сўмгача ошди.