“Пахтакор” футболчиси Муҳаммадали Ўринбоев фаолиятини Англияда давом эттиради. Бу ҳақда Тошкент клуби расмий сайти хабар берган.

Ўзбек футболи тарихида илк бор футболчимиз Ўзбекистондан Англияга тўғридан-тўғри йўл олди. “Пахтакор” академияси тарбияланувчиси Муҳаммадали Ўринбоев фаолиятини АПЛ клуби “Брентфорд”да давом эттиради.

Клублар ўртасидаги келишувга мувофиқ, Муҳаммадали 30 июнга қадар “Брентфорд”да ижарада асосида ўйнайди. Ушбу муддатдан кейин эса Англия клуби футболчимизни сотиб олиш ҳуқуқига эга бўлади.

Маълумот ўрнида, Ўринбоев “Пахтакор”да 17 ёшга тўлмасдан ўз дебютини ўтказган ва ўз ёш тоифасида терма жамоа аъзоси саналади.

“Шу тариқа, иқтидорли футболчиларни етиштириб чиқаришда давом этаётган “Пахтакор” академиясининг навбатдаги тарбияланувчиси ҳам хориж чемпионатига йўл олди. Ҳозиргача Англиянинг профессионал клубларида ўзбек футболчиси фаолият олиб бормаган”, — дейилади клуб хабарида.

Қайд этиш мумкин, “Брентфорд” АПЛ 20-туридан кейин 22 очко билан 15-ўринда бормоқда.