Истиқболли лойиҳалар миллий агентлиги матбуот хизматининг хабар беришича, агентлик ва Tether компанияси Ўзбекистонда крипто-активлар ва блокчейн инфратузилмаси соҳасида технологияларни ривожлантириш, шунингдек, инновацияларни рағбатлантириш мақсадида ўзаро англашув меморандумини имзолади.

Томонлар Ўзбекистонда блокчейн технологиясини, стабил токенларни ва активларни токенизация қилишни ривожлантириш, шунингдек, мамлакатда иқтисодий ўсиш ва инновацияларни рағбатлантиришда ҳамкорлик қилади.  

Ўзаро ҳамкорлик крипто-активлар айланмаси соҳасидаги қонунчилик базасини такомиллаштириш, CBDC (Central Bank Digital Currency) ва активларни токенизация қилиш технологияларини жорий этиш, блокчейн ва крипто-активлар технологиялари соҳасида аҳолининг хабардорлиги ва саводхонлигини ошириш мақсадида таълим ташаббуслари бўйича ҳамкорлик қилишга қаратилган бўлади.  

Tether ва агентлик республиканинг тегишли идоралари билан биргаликда тезроқ, хавфсизроқ ва тежамкор транзакцияларни жорий этиш мақсадида Ўзбекистоннинг рақамли валютасини яратиш бўйича ҳамкорлик қилади.  

Маълумот ўрнида айтиш жоиз, Tether стабилкоинларни чиқариш ва улардан фойдаланиш ҳамда рақамли молия соҳасида жаҳон етакчиларидан бири ҳисобланади. Tether (USDT) токени Tether компанияси томонидан 2014 йилда чиқарилган. Ушбу токенни ишлаб чиққанларнинг асосий ғояси – бозор иштирокчиларига курси АҚШ доллари курсига боғланган, яъни нисбатан ўзгарувчан бўлмаган крипто-активдан фойдаланиш имкониятини яратишдир.  

Яъни, бир USDT нархи 1 АҚШ долларига тенг (1 USDT = 1 АҚШ доллари). USDT токени барқарор токенлар орасида биринчи ўринни эгаллайди ва халқаро криптоплатформаларда капиталлашув ва айланма бўйича энг яхши учта крипто-активлар қаторига киради.