Украина президенти Владимир Зеленский шу ҳафта охирида Хиросимада бўлиб ўтадиган G7 саммитида шахсан иштирок этишни режалаштирмоқда. Бу ҳақда Financial Times хабар берди. Украина расмийлари Зеленскийнинг аниқ қачон Японияга кетиши ҳақида маълумот беришмаган, бу унинг сафари тафсилотлари хавфсизлик нуқтаи назаридан сир тутилиши билан боғлиқ бўлиши мумкин. Хиросимада йиғиладиган АҚШ, Япония, Канада, Британия, Франция, Германия ва Италия етакчилари келгуси уч кун ичида Россия-Украина можаросининг барча жиҳатларини муҳокама қилади. Катта эҳтимол билан, саммитда санкцияларни қўллаш, Киевга Ф-16 қирувчи самолётларини тақдим этиш, шунингдек, сулҳ ёки тинчлик шартномаси бўйича музокаралар ўтказиш имкониятлари муҳокама қилинади. The New York Times нашрининг ёзишича, Зеленский бутун дунё эътиборини ўзига жалб қилиш қобилиятига эга бўлиб, Ғарбдан самолётлар ва ҳарбий техника борасида кўпроқ ёрдам сўрайди ва уларнинг қўлловига интилади. Германия, Франция, Италия ва бошқа мамлакатларга қилган сўнгги сафарлари давомида у кўплаб қўшимча ҳарбий ёрдамга (қурол-яроғ, ҳарбий техника ва ҳк.) эга бўлди. Ҳозирча Зеленскийнинг режалари ҳақида жамоатчиликда ҳеч қандай  маълумот йўқ. Украина ОАВлари унинг саммитга виртуал қўшилишини тахмин қилаётганди. Бироқ, у ўтган ҳафта Буюк Британия ва бошқа Европа мамлакатларига ташриф буюрди ва унинг Киевдан ташқарига чиқиши қисман ўз ҳукумати барқарорлигини кўрсатиш учун мўлжалланган бўлиши мумкин. "Агар Зеленский Хиросимага келса, Байден билан деярли яккама-якка учрашиши аниқ. Ҳиндистон, Бразилия ва Украинани қўллаб-қувватлашни истамайдиган бошқа давлатлар раҳбарлари ҳам учрашувда кузатувчи сифатида қатнашади ва Зеленскийнинг саммитда шахсан иштирок этиши уларнинг ўз позициясини сақлаб қолишини қийинлаштириши мумкин, деб тахмин қилмоқда айрим расмийлар.