Ўзбекистон Республикаси “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги Қонуннинг 24-моддасида қуйидагилар жамоат жойларига кирувчи ҳудудлар ва объектлар санаб ўтилган.

Қуйидагилар жамоат жойлари ҳисобланади:

• стационар савдо объектлари, умумий овқатланиш корхоналари;
   
• кинотеатрлар, театрлар, цирклар, концерт, кўрик ва кўргазма заллари ҳамда оммавий дам олиш учун ёпиқ иншоотлар;
   
• клублар, дискотекалар, компьютер заллари, Интернет хизматлари кўрсатиш учун жиҳозланган хоналар ёхуд бошқа кўнгилочар жойлар;
   
• музейлар, ахборот-кутубхона муассасалари ва маърузахоналар;
   
• маҳаллий ва узоққа қатнайдиган поездлар, шаҳар атрофига қатнайдиган поездларнинг вагонлари, дарё кемалари, шаҳар, шаҳар атрофига, шаҳарлараро ва халқаро қатнайдиган автобуслар, таксилар, йўналишли таксилар ҳамда шаҳар электр транспорти, ҳаво кемалари; 
   
• ер ости ўтиш жойлари, транспорт бекатлари ва автотранспорт воситаларини вақтинчалик сақлаш жойлари;
   
• аэропортларнинг, темир йўл, автомобиль вокзалларининг ва сув транспорти бекатларининг бинолари;
   
• давлат ҳокимияти ва бошқаруви органларининг, хўжалик бошқаруви органларининг, шунингдек корхоналар, муассасалар ва ташкилотларнинг бинолари;
   
• соғлиқни сақлаш тизими муассасалари ва ташкилотлари, таълим муассасалари, жисмоний тарбия-соғломлаштириш ва спорт иншоотлари;
• иш жойлари бўлган хоналар;
   
• кўп квартирали уйларнинг йўлаклари, шунингдек уйлар олди ҳудудида жойлашган болалар ва спорт майдончалари;
   
• хиёбонлар, боғлар, кўчалар ва бошқа жойлар.

Жамоат жойларида қуйидагилар тақиқланади:

• тамаки маҳсулотларини истеъмол қилиш, шунингдек чилим ва электрон сигареталар чекиш;
   
• уятли сўзлар билан сўкиниш, ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи шу каби бошқа хатти-ҳаракатларни содир этиш;
   
• алкоголь маҳсулотини истеъмол қилиш;
   
• тиланчилик қилиш;
   
• рўйхатдан ўтказилмаган байроқлар ва вимпеллардан фойдаланиш;
   
• ит ва мушукларни тумшуқбоғсиз ва етовсиз олиб юриш.

Жамоат жойларида мазкур хатти-ҳаракатларни содир этиш маъмурий ёки жиноий жавобгарликка сабаб бўлади.

Жумладан, Маъмурий жавобгарлик тўғрисидаги Кодекснинг:

— 56 (1) моддасида жамоат жойларида тамаки маҳсулотини истеъмол қилганлик учун,

—  187-моддасида жамоат жойларида алкоголь маҳсулотини истеъмол қилганлик учун,

— 188 (3)-моддасига кўра, тиланчилик қилганлик учун, 

— 211-моддасига кўра, ёнғин хавфсизлиги қоидаларини бузганлик учун жавобгарлик белгиланган.

МЖтКда қайд этилган эпидемияларга қарши кураш қоидаларини бузиш (54-м.), жамоат жойларида тамаки маҳсулотини истеъмол қилиш (56-1-м.), майда безорилик (183-м.), фуқароларнинг жамоат жойларида ибодат либосларида юриши (184-1-м.), совуқ қуролни ёки совуқ қурол сифатида фойдаланилиши мумкин бўлган ашёларни олиб юриш (185-2-м.), жамоат жойларида алкоголь маҳсулотини истеъмол қилиш (187-м), тиланчилик қилиш (188-3-м.), байроқлар ва вимпеллардан ғайриқонуний фойдаланиш, плакатлар, эмблемалар ва рамзларни тайёрлаш, тарқатиш ёки тақиб юриш (203-м.) ҳамда ёнғин хавфсизлиги қоидаларини бузиш (211-м.) каби ҳуқуқбузарликлар назарда тутилган моддаларни қўллашда бевосита “жамоат жойи” тушунчасига дуч келамиз.