Корея-Ўзбекистон бизнес уюшмаси раиси, "Shindong Resources" компанияси раҳбари Ким Ёнг Гу "Дунё" АА учун интервьюсида Ўзбекистон Президенти Шавкат Мирзиёевнинг Тошкент халқаро инвестиция форумидаги иштироки ҳақидаги фикрларини билдирди:

– Учинчи Тошкент халқаро инвестиция форуми Ўзбекистоннинг истиқболли инвестициявий имкониятларини муҳокама қилиш учун бизнес вакиллари, ҳукумат ва инвесторларни бирлаштирган муҳим тадбирдир.

Давлат раҳбарининг мазкур тадбирда иштирок этиши мазкур форумнинг аҳамияти ва Ўзбекистон ҳукуматининг инвесторларга ёрдам беришга тайёрлигини таъкидлайди.

Ўзбекистон Президенти инвестициявий муҳитни яхшилаш, тадбиркорликни ривожлантириш учун шарт-шароит яратиш, инвесторлар имкониятларини кенгайтиришга қаратилган муҳим ғоя ва таклифларни билдирди. Масалан, 20 гигаваттдан ортиқ қайта тикланадиган энергия қувватини яратиш ва унинг улушини 2030 йилгача 40 фоизга етказиш мақсадида Ўзбекистоннинг "яшил" энергия бўйича улкан режаларини намойиш этади.

Жаҳондаги етакчи компаниялар билан биргаликда йирик шамол ва қуёш электр станцияларининг ишга туширилиши, "ACWA Power" компанияси билан биргаликда амалга оширилаётган "яшил" водород лойиҳаси ҳам бу соҳадаги салмоқли ютуқлардир.

Мазкур лойиҳалар давлат-хусусий шериклик асосида тўғридан-тўғри хорижий инвестициялар ҳисобидан амалга оширилаётгани уларнинг муваффақиятли амалга оширилиши ва мамлакатда "яшил" энергетикани ривожлантиришга хизмат қилаётгани алоҳида аҳамият касб этмоқда.

Қўшни Қирғизистон ва Тожикистонда гидроэлектр станцияларини ҳамкорликда қуриш лойиҳаларининг тақдимоти минтақанинг барча давлатларининг етакчи компаниялари билан бу йўналишда очиқ мулоқот ва амалий ҳамкорлик қилиш учун янги имкониятлар очмоқда. Бу, шубҳасиз, энергетиканинг барқарор ривожланишини таъминлаш ва минтақанинг умумий фаровонлигига ҳисса қўшиш йўлидаги муҳим қадам бўлади.

Қайд этиш керакки, форум иқтисодий ўсишни рағбатлантириш ва инвестициявий муҳитни яхшилашга қаратилган стратегик ташаббус ва лойиҳаларни эълон қилиш платформасига айланди. Унда қатнашаётган иштирокчилар сонининг ўсиши ва уларнинг ранг-баранглиги Ўзбекистон бозорига қизиқиш ортиб бораётганидан, шунингдек, Президент Шавкат Мирзиёев раҳнамолигида мамлакатда амалга оширилаётган ислоҳотларга билдирилаётган юксак ишончдан далолат беради.