Иссиқ ҳавода организмдаги метаболик жараёнлар секинлашади, у камроқ энергия сарфлайди, шунинг учун бундай пайтда иштаҳа йўқолади. Шундай бўлсада, таомланиш жуда муҳим.

Иссиқ кунларда сиз фойдали моддаларни ўз ичига олган енгилроқ таомларни  истеъмол қилиш учун таомномангизни янгилашингиз, сув-туз мувозанатини сақлашингиз ва сувсизланишни олдини олишингиз лозим.

Ёз ойларида полиз маҳсулотларидан кўпроқ бодринг истеъмол қилиш тавсия этилади. Бу сабзавот таркиби 95 фоиз сувдан иборат, у танадаги камайган суюқликнинг ўрнини тўлдиради. Айниқса очиқ ҳавода кўп вақт ўтказадиганлар бу сабзавотни кўпроқ истеъмол қилсалар фойдадан ҳоли бўлмайди. Бундан ташқари, бодринг сув-туз мувозанатини яхшилашга ёрдам беради.

Шунингдек, ёзги таомномангизга турли хил кўкатлар: арпабодиён, отқулоқ, пиёз, салат барги, райҳон, исмалоқ ва бошқаларни киритишингиз лозим. Чунки кўкатлар таркибида кўплаб витаминлар ва минераллар мавжуд бўлиб, у овқат ҳазм қилиш тизимини яхшилашга, асаб тизими, юрак ва қон томирлари, тери, тирноқ ва сочларнинг соғломлашишига ижобий таъсир кўрсатади.

Чанқоқни босадиган яна бир маҳсулот бу – тарвуздир. Унинг таркиби 92 фоиз сувдан иборат. Тарвуз иммунитет тизими, юрак ва қон томирларига фойдали таъсир кўрсатиб, мушаклардаги тиқилмалардан халос бўлишга ёрдам беради. Бу меванинг калорияси анча паст бўлиб, у парҳез овқатланишга риоя қилаётганлар учун жуда қулай ҳисобланади.

Яна бир фойдали маҳсулот бу — Грейпфрут цитрус меваси бўлиб, унинг таркибида иммунитетни мустаҳкамловчи С витамини мавжуд. Бу мевада ҳам юрак-қон томир тизими, буйраклар ва суякларга ёрдам берадиган кенг турдаги фойдали моддалар мавжуд. Шу билан бирга, ёзда тетиклантирувчи маҳсулотлардан ташқари, тана учун етарли миқдорда тоза ичимлик сувини истеъмол қилиш керак.