АҚШнинг Мейн штатидаги Люистон шаҳрида қуролли шахс одамларга қарата ўқ узди.  Камида 22 киши ҳалок бўлгани, 60 дан ортиқ киши жароҳатлангани хабар қилинган. Полиция маълумотларига кўра, ҳужумчи ҳалигача зарарсизлантирилмаган. Полиция жиноятчи қуролли ва ўта хавфли экани ҳақида огоҳлантирмоқда. Гумонланувчининг шахси аниқланган, у 40 ёшли Роберт Карддир. Штатнинг иккинчи йирик шаҳри аҳолисига хавфсиз жойларда бошпана топиш тавсия этилган ва шаҳарда тўлиқ карантин жорий этилган. Штат полицияси гумонланувчининг шахсини аниқлашда ёрдам сўраб, унинг суратини эълон қилган. “Люистонда фаол отишма мавжуд. Биз аҳолидан бошпанада қолишларини сўраймиз. Илтимос, уйларингизда қолинг ва эшикларингизни қулфланг,” – деган Мейн штати полицияси Ижтимоий тармоқдаги саҳифасида. Оқ уйнинг билдиришича, Президент Жо Байден воқеа ҳақида хабардор қилинган.