Ўзбекистон Республикасининг “Чиқиндилар тўғрисида”ги Қонуннинг мақсади чиқинди билан боғлиқ ишларни амалга ошириш соҳасидаги муносабатларни тартибга солишдан иборат.

Аҳолининг экологик маданиятини юксалтириш, атроф-муҳитга жиддий муносабатни шакллантириш масалаларига дунёнинг кўплаб мамлакатларида катта эътибор қаратилади. Жорий тартиб-қоидаларга риоя қилмаган фуқароларга нисбатан қатъий чоралар кўрилади.

Халқимиз азалдан тозалик, озодалик ва покизаликка алоҳида эътибор қаратиб келади. Хонадон, маҳалла тозалигини таъминлашга ҳар доим аҳамият берамиз. Айрим фуқаролар тозаликка эътибор бермаслигидан ажабланамиз.

Хусусан, автомобилда кетаётганда ҳар хил чиқиндиларни улоқтириб кетиш, кўчада ахлат ташлаш учун қўйилган махсус идишлар бўла туриб чиқиндини юрган йўлига ташлаб кетиш каби ҳолатларга кўзимиз тушади.

Ўзбекистон Республикаси Маъмурий жавобгарлик тўғрисидаги кодексининг 91(1)-моддасида ушбу ҳолат учун жарима белгиланган. Мазкур модданинг биринчи қисмига кўра, белгиланмаган жойларга қаттиқ маиший чиқиндиларни ва қурилиш чиқиндиларини ташлаш, шунингдек суюқ маиший чиқиндиларни тўкиш —

фуқароларга базавий ҳисоблаш миқдорининг бир бараваридан уч бараваригача, мансабдор шахсларга эса — ўн бараваридан йигирма бараваригача миқдорда жарима солишга сабаб бўлади.

Сиздан ҳам атроф-муҳитга масъуллик ҳисса ўлароқ салбий ҳолатларга гувоҳ бўлганингизда, шахсий муносабат билдириб, тўхтатиб қолишни ёки ҳудуддаги Экология масъулларига хабар беришингиз сўраб қоламиз! Унутманг, бизда мавжуд биргина она табиат учун ҳамма бирдек — масъул!

Дилмурод Маматмуротов,
“Адолат” миллий ҳуқуқий ахборот маркази ходими