Вазирлар Маҳкамасининг қарорига мувофиқ Давлат мактабгача таълим ташкилотларида болалар таъминоти учун ота-оналар тўлови миқдорлари белгиланган.

Боғчада тўловнинг бир кунлик қиймати бир ойлик тўлов миқдори шу ой мобайнидаги иш кунлари сонига бўлиш орқали аниқланади.

Агар битта оиладан 2 ва ундан ортиқ болалар турли боғчаларга қатнаса, ота-оналар бир фарзанди борадиган боғчага иккинчи фарзанди борадиган боғчадан унинг қатнаши тўғрисида маълумотномани тақдим этиши лозим.

Боғчаларда тўловлар ҳар ойнинг 15-санасидан кечиктирмасдан тўланади. Ойнинг 15-санасидан кейин келган болалар таъминоти учун тўловлар эса, бола келган кундан бошлаб 3 кун ичида тўланади. Бунда тўловлар боланинг шу ойда боғчага қатнайдиган кунларга мутаносиб равишда тўланади.

Боғчаларда тўловлар банклар (жамғарма кассалар) орқали нақд пул ёки нақд пульсиз шаклда (банк пластик карточкалари орқали ва пул ўтказиш йўли билан) тўланади. Бунда тўловнинг амалга оширилганлигини тасдиқловчи ҳужжат нусхаси боғчага тақдим этилади.

Тўловларни вақтида тўламаслик оқибатлари:

— Ота-оналар томонидан тўловларни белгиланган миқдорда ва/ёки муддатлар ўтгач 2 ҳафта мобайнида узрли сабабларсиз тўланмаслик боланинг боғчада бўлишини тўхтатиш учун асос бўлади.

— Боғчага амалга оширилмаган тўлов 60 кун ичида тўлаб берилганда, болани тегишли боғчага тиклаш мажбурий тартибда амалга оширилади. Мазкур муддат ўтиб кетган тақдирда, боғчага болани тиклаш янги қабул қилинган болалар учун белгиланган тартибда амалга оширилади.