Булунғур туманидаги “Навбаҳор” маҳалласида яшовчи фуқаро А.Эшназарова 2019 йил тумандаги 3-сонли ДМТТга тарбиячи бўлиб ишга кирган. Орадан бир неча йил ўтиб, жорий йилнинг февраль ойидан касаллик варақаси билан таътилга чиқишига тўғри келган. Касаллик таътили тугагандан сўнг, яъни 2022 йил 21 июнь куни ишга чиқиш учун борганида мазкур ДМТТ директори “Иш ўрни йўқ”, деган важ билан ишга чиқишга рухсат бермаган. Шундан сўнг ҳуқуқлари поймол бўлган фуқаро А.Эшназарова туман адлия бўлимига мазкур муаммони бартараф этишда амалий ёрдам сўраб мурожаат қилди. Мурожаат ўрганилганда ушбу муаммо ўз тасдиғини топди. Қонунчиликка кўра, касаллик варақаси билан таътилга чиққан ходимни ишдан бўшатиш ё унга ишга чиқишга рухсат бермаслик мумкин эмас. Адлия бўлими томонидан 3-сонли ДМТТга тақдимнома киритилиб, таъсир чоралари натижасида А.Эшназарова ишга тикланди.