Кўп квартирали уйларда яшовчи ижтимоий ҳимояга муҳтож шахсларга қонунчиликда енгилликлар берилган. Масалан, умумий мол-мулкни сақлаш, ундан фойдаланиш ва уни таъмирлаш мақсадларида уларга субсидиялар берилади. Субсидияни қандай олиш мумкин? У кимларга берилади? Қаерга мурожаат қилиш керак? Коммунал тўловлар учун ҳам компенсация бериладими, кимларга? Нudud24.uz шулар ҳақида батафсил тушунтириш беради.

1. Қандай мақсадларда субсидия берилади?

Субсидия умумий мол-мулкни сақлаш, ундан фойдаланиш ва уни таъмирлаш ҳамда кўп квартирали уйга туташ ер участкасини ободонлаштириш учун мажбурий бадални тўлаш мақсадларида ажратилади. Субсидия олиш учун ижтимоий ҳимояга муҳтож кўп квартирли уйларда яшовчи уй эгалари “Ижтимоий ҳимоя ягона реестри” ахборот тизимига киритилган бўлиши лозим.

2. Субсидия ажратиладиган шахслар қандай аниқланади?

Ижтимоий ҳимояга муҳтож шахс тўғрисидаги маълумотлар “Ягона реестр” ахборот тизимига киритилади. Иқтисодиёт ва молия вазирлиги ҳар ойнинг 2-санасига қадар жорий ой ҳолати ушбу маълумотларни Қурилиш ва уй-жой коммунал хўжалиги вазирлигига ахборот алмашуви тизими орқали электрон шаклда юборади. Қурилиш ва уй-жой коммунал хўжалиги вазирлиги келиб тушган маълумотларни “Mening uyim” ахборот тизимидаги маълумотлар билан умумлаштиради ва фарқлар юзага келган тақдирда, уларни 5 иш куни давомида бартараф этиш бўйича чоралар кўради. Умумлаштирилган якуний маълумотлар Иқтисодиёт ва молия вазирлиги ва Қурилиш ва уй-жой коммунал хўжалиги вазирлигининг ҳудудий бошқармаларига тақдим қилинади.

3. Субсидия қандай берилади?

Қурилиш ва уй-жой коммунал хўжалиги вазирлигининг ҳудудий бошқармалари томонидан икки иш куни давомида субсидия ажратиш учун тегишли ғазначилик бўлинмаларида махсус ҳисобварақлар очилади ҳамда туманлар (шаҳарлар) ҳокимликларига субсидия ажратиш бўйича қонунчиликда белгиланган шаклда сўровномалар юборилади. Туманлар (шаҳарлар) ҳокимликлари беш иш куни давомида сўровномада кўрсатилган маблағларни “Темир дафтар”га киритилган оилаларни қўллаб-қувватлаш чора-тадбирларини молиялаштириш манбалари, “Аёллар дафтари” ва “Ёшлар дафтари” жамғармалари ҳисобидан “Ягона реестр” ахборот тизимига киритилган ижтимоий ҳимояга муҳтож кўп хонадонли уй эгаларига мажбурий бадал учун субсидия ажратиш мақсадида тегишли ғазначилик бўлинмаларида очилган махсус ҳисобвараққа ўтказиб беради. Қурилиш ва уй-жой коммунал хўжалиги вазирлигининг ҳудудий бошқармалари икки иш куни давомида махсус ҳисобвараққа келиб тушган маблағлар ҳисобидан “Ягона реестр” ахборот тизимига киритилган ижтимоий ҳимояга муҳтож кўп хонадонли уйларнинг ҳар бир эгалари учун биллинг тизими орқали уларга хизмат кўрсатувчи кўп квартирали уйларни бошқариш органларининг ҳисобварағига мажбурий бадал учун субсидия тўловини ўтказиб беради.

4. Субсидия ажратилганлиги ҳақида қандай огоҳлантирилади?

Субсидия ажратилганда, биллинг тизими орқали тегишли ой учун субсидия ажратилганлиги тўғрисида SMS-хабарнома юборилади.

5. Субсидия учун зарур маблағлар молиялаштириш манбаларидан сарфланишини ким таъминлайди?

Туман (шаҳар) ҳокими субсидия учун зарур маблағлар тегишли молиялаштириш манбаларидан сарфланишини таъминлайди.

6. Коммунал хизматлар ҳақини тўлаш бўйича компенсация пули кимларга тўлаб берилади?

Уй-жой-коммунал хизматлар ҳақини тўлаш бўйича компенсация пули пенсия ёки нафақа олмайдиган уй-жой-коммунал хизматлар ҳақини тўлаш бўйича компенсация пул тўловларини олиш ҳуқуқига эга бўлган шахсларга тўланади.

7. Коммунал хизматлар ҳақини тўлаш бўйича компенсация пули қанча миқдорда ва муддатда тўланади?

Уй-жой-коммунал хизматлар ҳақини тўлаш бўйича компенсация пули 2022 йил 1 мартдан бошлаб Ўзбекистон Республикаси Иқтисодиёт ва молия вазирлиги ҳузуридаги бюджетдан ташқари Пенсия жамғармаси орқали фуқароларнинг пенсия ва нафақалар тўланадиган тартиби ва муддатларда тўланади.

Турғун Азимов,

Адлия вазирлиги масъул ходими