Ҳар бир жамиятда мулк ва унинг ҳуқуқий муҳофазаси устувор аҳамиятга эга. Эгалик қилиш ҳуқуқи – инсон ёки ташкилотларнинг муайян мол-мулкка нисбатан ҳуқуқий дахлдорлигини белгиловчи асосий ҳуқуқлардан бири бўлиб, у қонунчиликда аниқ тартибга солинади. Бунда эгалик ҳуқуқининг вужудга келишида муддат тушунчаси муҳим аҳамият касб этади.

Муддат орқали шахслар ўз ҳуқуқини ҳимоя қилиш ва мулкка эгалик қилиш имкониятига эга бўлади, бу эса ҳуқуқий барқарорлик ва ижтимоий мувозанатни таъминлайди.

Мулкдор бўлмаган, лекин кўчмас мол-мулкка ўн беш йил давомида ёки бошқа мол-мулкка беш йил давомида ўзиники каби ҳалол, ошкора ва узлуксиз эгалик қилган шахс бу мол-мулкка мулк ҳуқуқини олади (эгалик қилиш ҳуқуқини вужудга келтирувчи муддат).

Кўчмас ва бошқа мол-мулкка давлат рўйхатидан ўтказилиши шарт бўлган мулк ҳуқуқи ушбу мол-мулкка эгалик қилиш ҳуқуқини вужудга келтирувчи муддат туфайли олган шахсда ана шундай рўйхатдан ўтказилган пайтдан бошлаб вужудга келади.

Эгалик қилиш ҳуқуқини вужудга келтирувчи муддат туфайли мулк ҳуқуқини олганга қадар мол-мулкка ўзиники каби эгалик қилиб турган шахс ўз эгалигини мол-мулкнинг эгалари бўлмаган, шунингдек қонунда ёки шартномада назарда тутилган бошқа асосларга кўра эгалик қилиш ҳуқуқи бўлмаган учинчи шахслардан ҳимоя қилиш ҳуқуқига эга.

Эгалик қилиш муддатини важ қилиб келтирадиган шахс ўзи ҳуқуқий вориси бўлган шахснинг бу мол-мулкка эгалик қилиб келган барча вақтини ўзининг эгалик қилиш вақтига қўшиши мумкин.