Ижтимоий тармоқда Тошкент шаҳридаги “Эски ТошМи” тиббиёт академиясининг биноси бузилиши ҳақида хабарлар тарқалди. Ҳолат юзасидан Маданий мерос агентлиги муносабат билдирди.

Келтирилишича, агентликнинг Тошкент шаҳар бошқармаси томонидан ўрганиш ишлари олиб борилган. Пойтахтнинг Яшнобод туманида жойлашган “Эски ТошМИ” (Тиббиёт 29-сон даволаш бўлими академияси) биноси Вазирлар Маҳкамасининг 2019 йил 4 октябрдаги “Моддий маданий мероснинг кўчмас мулк объектлари миллий рўйхатини тасдиқлаш тўғрисида”ги қарори билан маданий мерос объекти сифатида рўйхатга олинган. Мазкур тиббиёт муассасаси ХИХ асрда қурилган бўлиб, ҳозирда бино давлат мулки ҳисобланади. 

"Муаммо ўрганилганида ҳеч қандай қурилиш-таъмирлаш ишлари олиб борилмаётгани аниқланди. Тиббиёт маскани маъмуриятига бинода қурилиш-таъмирлаш ишларини олиб бориш учун Маданий мерос агентлиги ҳузуридаги Илмий-эксперт кенгашининг тегишли рухсатномаси асосида ва лойиҳа-сметаларини тақдим этган ҳолда иш бошлаш кераклиги алоҳида тушунтирилди", дейилади муносабатда.

Маълумот учун, “Маданий мерос объектларини муҳофаза қилиш ва улардан фойдаланиш тўғрисида”ги қонунининг 23-моддасига мувофиқ “Давлат мулкида турган моддий маданий мерос объектлари давлат тасарруфидан чиқарилиши ва хусусийлаштирилиши мумкин эмаслиги” белгиланган.