Ҳукуматнинг 2021 йил 25 октябрдаги 656-сонли қарори билан “Етим болалар ва ота-она қарамоғидан маҳрум бўлган болаларни уй-жой билан таъминлаш тартиби тўғрисида”ги Низом тасдиқланган. Унга кўра, етим болалар ва ота-она қарамоғидан маҳрум бўлган болаларни томонидан шартнома асосида ижарага олинган уй-жойларнинг ижара тўловлари тўлаб берилади.

Уй-жойга муҳтож етим бола ва ота-она қарамоғидан маҳрум бўлган бола деганда ким тушунилади?

Уй-жойга муҳтож етим бола ва ота-она қарамоғидан маҳрум бўлган бола — ўзларига бириктирилган турар жойга эга бўлмаган ва меросхўр ва мол-мулкка эгалик қилишнинг бошқа шакллари билан номида уй-жой бўлмаган Меҳрибонлик уйлари, «SOS — Ўзбекистон болалар маҳаллалари» уюшмасининг Болаларни муқобил парвариш қилиш хизматлари, ҳомийлик, оилага тарбияга (патронат) берилган, оилавий болалар уйлари ёки Республика ўқув-тарбия муассасаларида тарбияланган 18 ёшга тўлган етим ва ота-она қарамоғидан маҳрум бўлган шахслардир.

Нима қилиш керак?

Бунинг учун «Онлайн-навбат» ахборот тизимига киритилган  етим болалар ва ота-она қарамоғидан маҳрум бўлган болалар улар томонидан ижарага олинган уй-жойларнинг ижара тўловларини тўлаш бўйича 2 хил усулда мурожаат қилишлари мумкин.

Биринчи усул, «Инсон» марказига бориш орқали мурожаат қилиш, иккинчиси «Ягона миллий ижтимоий ҳимоя» ахборот тизимидаги «Уй-жой ижараси» модули орқали ариза билан мурожаат қилиш.

Ижара тўлови қуйидаги ҳолларда  тўлаб берилади:

- болага мулк ҳуқуқи асосида уй-жой ажратилмаган бўлса;

- ижара шартномаси солиқ органларида ҳисобга қўйилган бўлса;

- бола тегишли олий таълим ташкилотининг ётоқхонасига жойлашмаган ёки ижара учун компенсация олмаётган бўлса;

- бола билан тузилган меҳнат шартномаси «Ягона миллий меҳнат тизими»да рўйхатдан ўтказилган бўлса.