Ҳар биримизда шахсимизни тасдиқловчи ҳужжатлар бор. Аммо айрим ҳолатларда фамилия ёки исмлардаги хатоликлар ёки турли сабаблар уларни ўзгартиришимиз учун етарлича асосдек кўринади. Ҳеч ўйлаб кўрганмисиз, фамилияни ўзгартириш тартиби қандай, аслида уни ўзгартириш мумкинми? Бу ҳақда қонунчиликда нима дейилади?

Фамилия, исм ва ота исмини ўзгартириш ҳақидаги аризалар ариза берувчи 16 ёшга тўлгандан кейин у яшаб турган жойдаги ФҲДЁ органи томонидан кўриб чиқилади.

Агар 16 ёшга тўлган шахс паспорт ёки паспорт ўрнини босувчи шахсни тасдиқловчи бошқа ҳужжат олгунга қадар фамилияси, исми, ота исмини ўзгартириш ҳақида ариза берса, у ҳолда аризага туғилганлик ҳақида гувоҳнома илова қилинади.

Фамилия, исм ва ота исмини ўзгартириш ички ишлар органлари хулосаси асосида амалга оширилади.

Фамилия, исм ва ота исмини ўзгартириш тўғрисидаги ариза ариза берилган кундан бошлаб 2 ой мобайнида кўриб чиқилади. Агар узрли сабаблар мавжуд бўлганда ФҲДЁ органи мудири ушбу муддатни 1 ойдан кўп бўлмаган муддатга узайтириши мумкин бўлади. Шунингдек, қуйидагилар фамилия, исм ва ота исмини ўзгартириш учун асос бўлади:

— миллий-тарихий анъаналарга мувофиқ бўлса;

— суднинг ҳал қилув қарори асосида;

— агар фамилия ва исм эшитилишда ёқимсиз бўлса;

— агар фамилия ва исм миллатига тўғри келмаса;

— хоҳишга қараб никоҳгача бўлган фамилияга қайтишда;

— оила учун умумий фамилияда бўлиш истаги пайдо бўлганда:

— 16 ёшга тўлган шахсга оталикни белгилашда кўриб чиқилади.

Кўрсатиладиган хизмат учун тўлов ундирилади.