Бугун, 21 январь куни Гая (Ҳиндистон) – Тошкент (ёқилғи қуйиш) – Жуковский (Москва) йўналиши бўйича рейсни амалга ошираётган Falcon 10 самолёти Афғонистонда радарлардан ғойиб бўлди, деб хабар берди Федерал ҳаво транспорти агентлиги.

Дастлабки маълумотларга кўра, бортда олти киши — тўрт нафар экипаж аъзоси ва икки йўловчи бўлган. Ҳозирда уни қидириш ишлари олиб борилмоқда. Самолёт Athletic Groupга тегишли.

Афғонистон шимолидаги полиция Бадахшон вилоятида самолёт қулагани ҳақида хабар олган. Ҳодиса мамлакат шимоли-шарқидаги олис тоғли Бадахшон ҳудудида содир бўлган.

ОАВ маълумотларига кўра, самолёт ўз йўналишидан четга чиқиб, Тожикистон билан чегарадан 30-40 километр узоқликдаги Зебак туманидаги тоққа қулаган. Ҳалокатдан олдин учувчи техник носозликлар ҳақида хабар берган.