Квартира сотиб олишдан аввал қурувчининг ваъдаларига эмас, расмий маълумотларга ишонинг!

Кўпчилик янги қурилаётган уйдан хонадон сотиб олишда қурувчининг оғзаки маълумотларига ишониб қарор қабул қилади. Аммо уйнинг неча қаватли бўлиши, нечта подъезддан иборатлиги, қурилишга рухсат берилгани ёки объектнинг амалдаги ҳолати каби муҳим маълумотларни расмий манбалар орқали текшириш мумкин.

Аввало, қурилиш объектини харитада текширинг

Қурилиш ва уй-жой коммунал хўжалиги вазирлигининг https://dshk.shaffofqurilish.uz/  платформаси орқали қурилиш объекти ҳақидаги муҳим маълумотларни кўриш мумкин.

Интерактив харитада объектлар қуйидаги рангларда белгиланган:

🔵 Кўк ранг — қурилиши давом этаётган объект;

🔴 Қизил ранг — қурилиши тўхтатилган объект;

⚫ Қора ранг — қурилиши бекор қилинган объект.

Шунингдек, объектнинг манзили, лойиҳа параметрлари ва айрим ҳолларда фотосуратлари билан ҳам танишиш мумкин. Бу эса харидорга қарор қабул қилишда ишончли ахборот манбаи бўлиб хизмат қилади.

Қурувчи айтган маълумотни текширинг

Қурувчи:

— уй нечта қаватдан иборатлиги;

— нечта подъезд қурилиши;

— нечта хонадон режалаштирилгани;

— қурилиш ҳолати каби маълумотларни айтган бўлса, уларни расмий электрон тизимдаги маълумотлар билан солиштириш мақсадга мувофиқ.

Улушли қурилишда янада эҳтиёткор бўлинг

Янги тартибга кўра, улуш киритиш асосида қурилаётган кўп квартирали уйларни сотиш белгиланган талаблар асосида амалга оширилади.

Хусусан:

— қурилиш ҳақидаги маълумотлар электрон платформада юритилади;

— шартномалар нотариал тартибда расмийлаштирилади;

— ҳуқуқлар давлат рўйхатидан ўтказилади;

— харидорлар маблағларини ҳимоя қилиш учун замонавий молиявий механизмлар қўлланилади.

Харид қилишдан олдин ушбу ҳужжатларни ҳам текширинг

✔️ қурилишга рухсатнома;

✔️ ер участкасига оид ҳуқуқни тасдиқловчи ҳужжатлар;

✔️ тасдиқланган лойиҳа ҳужжатлари;

✔️ қурилиш объектининг электрон тизимда мавжудлиги;

✔️ улушли шартнома қонун талабларига мувофиқ расмийлаштирилаётгани.

Хулоса

Янги қурилаётган уйни харид қилиш — катта инвестиция ҳисобланади. Шунинг учун квартира сотиб олишдан аввал қурувчининг реклама ва ваъдаларидан ташқари, қурилиш объекти ҳақидаги маълумотларни расмий давлат ахборот тизимлари орқали текшириш келгусидаги ҳуқуқий ва молиявий муаммоларнинг олдини олишга ёрдам беради.

Феруз Жўраев
тайёрлади