Йўловчилар транспорт воситасига фақат у тўлиқ тўхтагандан сўнг тротуар ёки йўл ёқаси томондан чиқишга ва тушишга мажбурдирлар. Йўловчиларнинг транспорт воситаларидан тротуар ёки йўл ёқаси томондан тушиши ёки уларга чиқишининг иложи бўлмаган ҳолларда, агар бу ҳаракат хавф туғдирмаса ёки бошқа йўл ҳаракати иштирокчиларига халақит бермаса, йўлнинг қатнов қисми томонидан амалга оширилиши мумкин.

Хавфсизлик камарлари билан жиҳозланган транспорт воситаларида ҳаракатланишдан олдин уларни тақиб олиш, мотоцикл, электромотоцикл, мопед ёки скутерларда ҳаракатланишидан олдин эса мотошлемни қадаб олиши шарт.

Шунингдек йўловчиларга қуйидагилар тақиқланади:

• транспорт воситаси ҳаракатланаётган вақтда ҳайдовчини бошқаришдан чалғитиш (унга халақит бериш);
• ҳаракатланаётган бортли юк автомобилларида тик туриш, бортларда ёки ундан юқоридаги юк устида ўтириш;
• транспорт воситаси ҳаракатланаётган вақтда унинг эшикларини очиш;
• транспорт воситаси ҳаракатланаётган вақтда салондан тана қисмларини (қўлдан ташқари) чиқариш.

Бу талабларнинг бажарилишини ҳайдовчи назорат қилиши керак.