Сингапур Президенти Ҳалима Ёқуб шу кунларда давлат ташрифи билан Ўзбекистонда бўлиб турибди. Сингапур тарихида ва умуман, дунё тарихида камёб саналадиган аёл президентлар доим жамоатчиликнинг диққат марказида бўлади. Улар ҳақидаги маълумотлар кўпчиликка қизиқ. Ҳалима Ёқуб ким? Сиёсатга қандай аралашиб қолган? Қанча ойлик оладию қандай ютуқларга эришган? Кўчада таом сотган қизалоқ Ҳалима Ёқуб 1954 йил 23 августда Сингапурда туғилган. Унинг отаси ҳиндистонлик, онаси эса Малайзиядан эди. Отаси қоровул бўлиб ишлаган ва Ҳалима жуда ёшлигидаёқ вафот этган. Ҳалима онаси билан кўчада таом сотиб, қийинчиликда кун кечирган. Шунга қарамай, у билимга чанқоқ эди, мактабда жуда яхши ўқийди ва таълим даргоҳини имтиёзли тамомлайди. Ҳалима Ёқуб ҳуқуқшунос. У 1978 йилда Сингапур университетида (1980 йилдан - Сингапур Миллий университети) ҳуқуқшунослик бўйича бакалавр, 2001 йилда ҳуқуқшунослик магистри даражасини олади. Сиёсатга йўл қаердан бошланган? Ўқишни тамомлаб, Ҳалима Касаба уюшмалари миллий қурултойида иш бошлайди, у Сингапур меҳнат тадқиқотлари институти директори ҳам бўлган. 2001 йилда у ҳукмрон Халқ ҳаракати партиясига (ХҲП) қўшилади, ўша йили ХҲПдан Сингапур парламентига аъзо бўлади. Ҳалима Ёқуб Халқаро меҳнат ташкилоти (ХМТ, Женева) қошидаги Меҳнат стандартларини қўллаш бўйича қўмита раисининг ўринбосари бўлган. Ўтган йиллар давомида у ХМТнинг бир қатор бошқа қўмиталарининг вакили бўлган. Сиёсий фаолияти давомида у Сингапурнинг Жамиятни ривожлантириш, ёшлар ва спорт масалалари бўйича давлат вазири, вазирлик қайта ташкил этилгандан сўнг Ижтимоий ривожланиш ва оила масалалари давлат вазири бўлади. Турли этник гуруҳларни бирлаштирган раҳбар 2013 йилда Ҳалима Ёқуб Сингапур парламенти спикери этиб сайланди ва мамлакат тарихида бу лавозимни эгаллаган биринчи аёл бўлди. 2017 йил 7 августда Президентликка номзоди кўрсатилганлиги муносабати билан истеъфога чиқди. Ҳалима Ёқуб президентлик сайловолди кампаниясида этник гуруҳлар бирлашувини энг муҳим масала сифатида кўтаради, давлат раҳбари “бирлаштирувчи куч” сифатида фаолият юритишини, турли этник гуруҳлар вакиллари биргаликда ҳаракат қилишлари кераклигини таъкидлайди. “Автоматик” тарзда сайланган Президент Сайлов пайти Ҳалимадан ташқари яна 4 киши президентликка даъвогарлик қиларди, бироқ барча номзодлар асосий талабларга жавоб бермагани учун сайловолди пойгасидан четлаштирилди. Сингапур сайлов қонунчилигига кўра, номзод давлат хизматида иш тажрибасига эга бўлиши ёки капитали 500 миллион Сингапур долларидан ошадиган компания раҳбари бўлиши керак. Ҳалима ягона номзод бўлиб қолиши натижасида 2017 йил 14 сентябрда у “автоматик” тарзда Сингапур Республикаси Президенти деб эълон қилинган. Ҳалима Ёқуб беш нафар фарзанднинг онаси. Аёллар, кексалар ва руҳий касалликларга чалинган одамларнинг ҳуқуқларини фаол қўллаб-қувватлайди. У Сингапур мусулмон аёллари ассоциациясининг (СМАА) ҳомийси, шунингдек, руҳий касаллиги бўлган одамларга ёрдам кўрсатадиган “Club Heal”нинг ҳомийси. Ҳалима Аҳмад президентлиги даврида Сингапурда нималар ўзгарди?

1. Сингапур фуқаросининг йиллик даромади 85000 доллардан ошди.
2. Сингапур паспорти (Япония паспортига ҳам шундай таъриф берилади) дунёда энг кучли, мустаҳкам паспорт ҳисобланади. Бунда Ҳалима Аҳмаднинг ҳиссаси бор. Бу давлат фуқаролари учун 2023 йилга келиб дунёда мавжуд 250 дан ортиқ давлатдан 192 та давлатга визасиз кириш мумкин бўлди. Япония ва Сингапурликлар АҚШ, Канада, Испания, Португалия ва бошқа мамлакатларга саёҳат қилишлари мумкин. Уларга Россия, Афғонистон, Жазоир, Шимолий Корея, Африка ва Яқин Шарқдаги баъзи мамлакатларгагина бориш учун виза керак.
3. Мамлакатда ишсизлик кўрсаткичи –1 фоиз.
4. Ўн мингга яқин катта корхоналар очилди.
5. Мамлакатдаги ишлаб чиқариш корхоналарига солинган барча солиқлар бекор қилинди.

Президентнинг даромади қанча? Wikipediaда Сингапур Президентининг йиллик, ойлик, кунлик даромадлари ҳақида маълумотлар берилган. Унга кўра Ҳалима Ёқуб: Йиллик: $1,540,000.00 АҚШ доллари Ойлик: $128,333.33 АҚШ доллари Ҳафталик: $29,615.38 АҚШ доллари Кунлик: $5,923.08 АҚШ доллари миқдорида даромад олади. Сингапур дунё миқёсида инфратузилмани, бутун орол бўйлаб тўлиқ интеграциялашган транспорт тармоғини, жонли бизнес муҳитини, жонли яшаш майдонини ва бой маданиятни яққол кўрсатган гуллаб-яшнаётган метрополдир.